Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Codi: 080,034 Autor: Bertran de Born Gènere: Sirventes Número: XXI

 

Qan la novella flors par el vergan

I	1	Qan la novella flors par el vergan,
		On son vermeill, vert e blanc li brondel,
		Ab la doussor qu’eu sent al torn de l’an
		Chant atressi cum fant li autre ausel ;
	5	Car per auzel mi teing e maintas res,
		Car aus voler tot lo mieills q’el mon es.
		Voler l’aus eu et aver cor volon,
		Mas no·il aus dir mon cor, anz lo·il rescon.
II		Eu non sui drutz, ni d’amor no·m feing tan
	10	Q’ieu en razon ges dompna ni n’apel,
		Ni non dompnei ; e si·m val atretan,
		Que lausengier fals, enoios, fradel,
		Desenseignat, vilan e malapres
		Ant dich de mi, tant en son entremes,
	15	Que fant cujar que la gensser del mon
		Mi tenga gai, gauzen e desiron.
III		C’om ses dompna non pot far d’amor chan,
		Mas sirventes farai fresc e novel.
		Puois chastiar cuidon en gerrian
	20	Nostre baron lo seignor de Bordel
		E per forssa tornar franc e cortes,
		Mal estara s’ancar vilans non es
		Tant que chascuns aia gauch si·l respon,
		E no·ls enoi si be·ls pela ni·ls ton !
IV	25	Anta i aura s’aissi pert son afan
		En Limozin on a traich tant cairel
		E tanta tor, tant mur e tant anvan
		Fraich e desfaich e fondut tant castel
		E tant aver tout e donat e mes
	30	E tant colp dat e receubut e pres
		E tanta fam, tanta set e tant son
		Cum el a traich d’Agen tro a Nontron.
V		Rassa, per vos remanon mout claman
		En Limozin de sai vas Monmaurel ;
	35	Pel vostre pro avetz faich de lor dan,
		So·m dis N’Aimars e·l seigner de Martel
		E·N Taillafer e·N Folcaus e·N Gaufres
		E tuich aicill c’ab vos s’eron enpres.
		Non ant las patz ges per vos en que son,
	40	Anz fant lor grat lai al comte Raimon.
VI		Sirventes, vai a·N Raimon Gausseran,
		Lai a Pinos, q’en ma razon l’espel
		Car tant aut son siei dich e siei deman
		De lieis que ten Cabrieira e fon d’Urgel.
	45	A mon Fraire en ren gratz e merces
		De Berguedan, del fin joi que m’enqes,
		Que tot mon cor en tornet gauzion
		Qan nos partim amdui el cap del pon.
E		Si cum l’auzeill son desotz l’aurion
	50	Son las autras sotz la genssor del mon.