Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Codi: 248,037=226,004 Autor: Guiraut Riquier, Guillem de Mur Gènere: Tenso Número: IX

 

Guilhem de Mur, que cuia far

I		Guilhem de Mur, que cuia far	[Guiraut]
		le franc rey d'Arago de nos,
		pus que l'avem trobat joyos?
		Que mot me fay meravilhar,
	5	car no·ns a dat a Monpeslier;
		qu'el sap c'a mi a gran mestier
		- si·l sove co s'es captengutz vas me -,
		per que, si·l play, esmendar m'o pot be.
II		Lo valen rey nos vol menar,	[Guilhem]
	10	en Guiraut, vas Mursi'abdos
		per fort bonas doas razos:
		e vol que l'anem aiudar
		cascus en loc de soudadier,
		car em gran e fort e sobrier;
	15	l'autra, per so car fara·ns lay gran be,
		amicx Guiraut, cant aurem fag perque.
III		Guilhem, le reys lay fay anar	[Guiraut]
		selh que son d'armas coratjos,
		e non es de mi ni de vos
	20	fag d'armas ni de nulh joglar;
		ni aras per sol alegrier
		non la·ns vol, mas si el conq[ui]er,
		cant er tornatz <n>os dara tant, so cre,
		qu'en serem ricx, per qu'eras no·ns don re.
IV	25	Ges no·m pot far desconortar	[Guilhem]
		que·l sieu segre no·ns sia pros;
		e si·ns tratz un petit sos dos,
		el nos fa dos tans trebalhar
		c'als autres, ie·m pens per loguier
	30	n'ayam dobl', en Guiraut Riquier,
		sol contra selhs que mescrezon la fe
		aiam quecx cor segon com lo cors ve.
V		Guilhem, vos en voletz trotier	[Guiraut]
		aver e pastor e bovier
	35	dels Sarrazis, e·l rey dara lo·us be,
		qu'ieu remanrai, car non an obs a me.
VI		Guiraut, sol que·m don bon destrier	[Guilhem]
		lo reys e rossi e saumier
		e l’autr’arnes c'al mieu par se cove,
	40	yeu l'anarai per mantener la fe.