Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Codi: 296,002=248,039 Autor: Marques, Guiraut Riquier Gènere: Tenso (Partimen) Número: X

 

Guiraut Riquier, a sela que amatz

I		Guiraut Riquier, a sela que amatz	[Marques]
		playra tot cant anc fezetz nulha via,
		ni ja faretz ni diretz negun dia,
		e desplaira a tota gen, sapchatz;
	5	e plaira fort a totz, si mais vos platz
		que desplassa a leys que nulh secors
		no·us fa ni·l play, so diretz, que.us retenha.
		Eras chauzetz, si que no·us descovenha,
		cal volratz mais? E no·us tuelha temors,
	10	que non prendatz yrnelamens de cors.
II		Marques, penray co hom desesperatz	[Guiraut]
		de sa dona, c'amat ay ab fadia
		mon Bel Deport e pieitz far no·m poiria,
		e sabretz o, si be mos chans gardatz,
	15	per que vuelh mays esser ab grat lauzatz
		per totas gens, que a totz fos dolors
		totz mos afars, et enuetz mortz m'estenha
		ans qu'ieu a lieys plassa, lieys que no·m denha.
		Aras diretz que mos ditz es folors,
	20	cays que vos es dels pus fis aymadors.
III		Guiraut Riquier, ges a mi no semblatz,	[Marques]
		car yeu vuelh may desplassa cuy que sia
		so que farai, que s'a luy desplazia,
		a cuy mi soi de totas res donatz;
	25	e play mi fort, car a totz demostratz
		que non chantatz per negunas amors,
		mas can per so, c'om vos do e que·us tenha
		per bon joglar; e ja Dieus no·us mantenha,
		c'aunitz avetz los joglars trobadors,
	30	car auzem los may huey per fenhedors.
IV		En tot falhetz, Marques, can razonatz	[Guiraut]
		qu'en res no son l'autre de res que·us dia;
		mas diatz, on temetz ab vostr'amia,
		c'a tota gen sal leys ira fassatz,
	35	car pus seretz malditz et encaussatz
		per totas gens que non es lops ni ors.
		Car la compratz: yeu vuelh may que·m destrenha
		dezirs per lieys, que·m fa de desgrat senha,
		plazen a totz; car segra m'en lauzors,
	40	e ma vida er me ses gaug honors.
V		Guiraut Riquier, mays no·us entrametatz	[Marques]
		ni non parletz d'amors en nulha guia,
		car non parlatz mas cant per joglaria,
		e laissas la a nos enamoratz,
	45	pus que·l deportz es per vos soanatz
		que voletz mays plazer als donadors
		et als autres; yeu vuelh mays que sovenha
		a ma dona de mi e que·m retenha,
		que dels autres, tan m'es sos gratz sabors,
	50	car ab beutat val sobre las melhors.
VI		Marques, s'ieu vuelh ben amar desamatz	[Guiraut]
		mon Bel Deport, aven plazen paria
		de totas gens; mais que far a sa guia
		del tot e que fos [per lieys] adziratz,
	55	ges no·l sofranh, ni·l parlar que·m mandatz
		non laissarai, car mot es grans errors
		so que dizetz - jes pretz no·us o ensenha -,
		car vos e leys, on dizetz que pretz renha,
		dechairetz, si que mai no seretz sors,
	60	et yeu vuelh laus que val mais que ricors.
VII		El bon senhor de Narbona, on renha	[Marques]
		fis pretz tot l'an, Guiraut, vuelh que retenha
		nostra razos e la jutje de cors,
		e que·m dia, si·l cre, chantes d'amors.
VIII	65	Lo jutjamen vuelh be, si dar lo denha,	[Guiraut]
		de mon senhor, Marques; car dretz m'ensenha
		que·l mielhs mantenh, e car l'es pretz lauzors,
		e crey qu’el cre c'aman chan ses secors.