Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Codi: 248,036=226,003 Autor: Guiraut Riquier, Guillem de Mur Gènere: Tenso (Partimen) Número: XI

 

Guilhem de Mur, chauzetz d'esta partida

I		Guilhem de Mur, chauzetz d'esta partida:	[Guiraut]
		essems irem tostemps mays cortz siguen,
		e l'us creys se de bon grat doblamen,
		mas a sos dos non l’er de creiser guida;
	5	l'autre creys se doblamens en dos,
		mas a son grat non er melhurazos.
		Eras parra com er per vos chauzida
		la melhor part segon la vostra vida.
II		Guiraut Riquier, de bos sens par falhida,	[Guilhem]
	10	cant hom lo mielh d'un joc partit no pren,
		per qu'ieu vuelh may de grat l'acreissemen,
		no fas dels dos; e car vos n'es cobida
		petita partz et a mi grans, a vos
		los laissarai, qu'es d'aver cobeitos,
	15	car ab bon grat aurai joia complida,
		enans c’ap dos, de lieys qu'es mot grazida.
III		Ges per bon grat ni per dos no·m compari,	[Guiraut]
		Guilhem, ab vos, qu'ieu say que may n'avetz;
		mas mal faretz si del pauc mi doletz,
	20	pus em compans et yeu de vos no·m guari,
		ans si doblan miey don, gaug vo·m donatz,
		c'a us er tost mos dezirs acabatz:
		que·l vostre gratz me play ses tot contrari
		e sos doblars, mas sels dels dos ampari.
IV	25	Guiraut, yeu vuelh, fe que dey sant Alari,	[Guilhem]
		d'est partimen so que vos en voletz,
		e prenc lo grat a mos obs, car ye·l pretz
		may que ses grat aver lo poder Dari,
		e dar m'ay gaug e plazer, sie·us doblatz
	30	e vostres dos, car ye·m tenh per paguatz
		ab selhs que·m prenc, et yra·m mielhs c'a Pari,
		s'ap grat m'acuelh silh qu'ieu non dezampari.
V		Que que·m diatz, dels dos no·m camjaria	[Guiraut]
		ni no·us porti enveia de bon grat,
	35	G[uilhem], e si·l doblatz, ab cor irat
		partretz de selh que·us daran tota via,
		et yeu ab gaug, car be·m daran dos tans
		c'a vos d<a>n, pueis seretz del tot clamans
		e neys a me·n portaretz gelozia,
	40	e puesc chauzir aisi com vos d'amia.
VI		Guiraut, del plag no·us valra gilozia,	[Guilhem]
		si tot lo cors avetz al mieu jutjat,
		qu'ieu serai mielhs grazit per bon agrat;
		c'ap penre vos er razonatz fulia,
	45	ca totz sels es, que·us donan, grans afans,
		e sie·us davan mays, seri'e[n] pus grans;
		e s'ieu los dos prenc que·m fa<n> cascun dia,
		pro serai ricx, ab que l'agrat y sia.
VII		Guilhem, mon grat vuelh ab los doblans,	[Guiraut]
	50	c'aysi serai jauzens e benanans.
		Vos amparetz per sol grat joglaria:
		n'Enricx o sap, el jutjamens sieus sia.
VIII		Ab mon bon grat m'anara mielhs dos tans,	[Guilhem]
		Guiraut, c'a vos ab vostres dos tirans,
	55	e n'Enricx sap que vers es la part mia,
		mais al jutjar vuelh n'Elionors y sia.