Serra-Baldó, Alfons. Els trobadors. Barcelona: Barcino, 1934 (2a ed. 1998).

Codi: 293,018 Autor: Marcabru Gènere: Vers Número: IV

 

Dirai vos senes duptansa

		[SIRVENTÈS*]
I	1	Dirai vos senes duptansa
		d’aquest vers la comensansa;
		li mot fan de ver semblansa;
		—Escoutatz!—
	5	qui ves Proeza balansa,
		semblansa fai de malvatz.
II		Jovens faill e fraing e brisa,
		et Amors es d’aital guisa
		de totz cessals a ces prisa,
	10	—Escoutatz!—
		chascus en pren sa devisa,
		ja pois non sera cuitatz.
III		Amors vai com la belluja
		que coa·l fuec en la suja;
	15	art lo fust e la festuja,
		—Escoutatz!—
		e non sap vas qual part fuja
		cel qui del fuec es gastatz.
IV		Dirai vos d’Amor com signa:
	20	de sai guarda, de lai guigna,
		sai baiza, de lai rechigna;
		—Escoutatz!—
		plus sera dreicha que ligna
		quand ieu serai sos privatz.
V	25	Amors soli’esser drecha,
		mas er’es torta e brecha,
		et a coillida tal decha
		—Escoutatz!—
		lai on non pot mordre, lecha
	30	plus aspramens no fai chatz.
VI		Greu sera mais Amors vera,
		pos del mel triet la cera,
		anz sap si pelar la pera.
		—Escoutatz!—
	35	Doussa’us er com chans de lera
		si sola la coa·l troncatz.
VII		Ab diables pren barata
		qui fals’Amor acoata,
		no·il cal c’autra verga·l bata;
	40	—Escoutatz!—
		plus non sent que cel qui·s grata
		tro que s’es vius escorjatz.
VIII		Amors es mout de mal avi;
		mil homes a mortz ses glavi,
	45	Dieus non fetz tant fort gramavi;
		—Escoutatz!—
		que tot nesci del plus savi
		non fassa, si·l ten al latz.
IX		Amors a uzatge d’ega
	50	que tot jorn vol c’om la sega
		e ditz que no·l dara trega
		—Escoutatz!—
		mas que puej de leg’en lega,
		sia dejus o disnatz.
X	55	Cujatz vos qu’ieu non conosca
		d’Amor s’es orba o losca?
		Sos digz aplan’et entosca
		—Escoutatz!—
		plus suau poing qu’una mosca,
	60	mas plus greu n’es hom sanatz.
XI		Qui per sen de femna reigna,
		dreitz es que mals li·n aveigna,
		si cum la Letra·ns enseigna;
		—Escoutatz!—
	65	malaventura·us en veigna
		si tuich no vos en gardatz!
XII		Marcabrus, fills Marcabruna,
		fo engenratz en tal luna
		qu’el sap d’Amor cum degruna,
	70	—Escoutatz!—
		quez anc non amet neguna,
		ni d’autra non fo amatz.
		(Text de Dejeanne)