Serra-Baldó, Alfons. Els trobadors. Barcelona: Barcino, 1934 (2a ed. 1998).

Codi: 210,008 Autor: Guillem de Berguedan Gènere: Sirventes Número: XIX

 

Chansoneta leu e plana

		[SIRVENTÈS]
I	1	Chansoneta leu e plana
		leugereta, ses ufana
		farai eu de mo marques,
		del trachor de Mataplana,
	5	qu’es d’engan farsitz e ples.
		A marques, marques, marques,
		d’engan etz farsitz e ples!
II		Marques, ben aion las peiras
		a Melgurs depres Someiras,
	10	on perdetz de las denz tres;
		ni ten dan que las primeiras
		i son e no·i paron ges.
		A marques, marques, marques,
		d’engan etz farsitz e ples!
III	15	Del bratz no·us pretz una figa,
		que cabrella par de biga
		e portatz lo mal estes;
		obs i auria ortiga
		que·l nervi vos estendes.
	20	A marques, marques, marques,
		d’engan etz farsitz e ples!
IV		Marques, qui en vos se fia,
		ni a amor ni paria:
		gardar se deu totas ves;
	25	c’om que·s ane de clar dia,
		de nueg ab vos non an ges.
		A marques, marques, marques,
		d’engan etz farsitz e ples!
V		Marques, ben es fols qui·s vana
	30	c’ab vos tenga meliana
		meins de braias de cortves;
		et anc fils de cristiana
		pejor costuma no mes.
		A marques, marques, marques,
	35	d’engan etz farsitz e ples!