Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Codi: 248,020=179,001 Autor: Guiraut Riquier, Coms d'Astarac Gènere: Tenso (Partimen) Número: XIII

 

Coms d'Astarac, ab la gensor

I		Coms d'Astarac, ab la gensor	[Guiraut]
		dona c'om puesqu'el mon chauzir
		estaretz ins en una tor
		enclaus tot un an ses issir,
	5	aman lieys d'agradatje
		coralmen, et vos aziratz
		per ela, o seretz amatz
		per lieys, mas fel coratje
		l'avretz. Pero dan no·us tenhatz,
	10	l'una part covens que prendatz.
II		Guiraut, partimen de dolor	[Coms d'Astarac]
		m'avetz fag, don soy en cossir;
		pero yeu prenc lo mens peior
		e vuelh may onrar e servir
	15	lieys, si be s'es salvatje,
		que per lieys esser deziratz,
		car seria·n d'Amors blasmatz
		si fels l'er'ap otratje,
		pus per autra no fos lassatz
	20	ni si·l avia brau solatz.
III		Senh'en coms, greu pot hom honor	[Guiraut]
		far a so que·l ten en azir;
		la·n vieuretz ab dobla tristor
		moren ses vieur'e ses murir
	25	ab lo peior estatje,
		aman leys qu'es fela, sapchatz,
		mas mens [de] mal vos for'assatz
		si tenguessetz en gatje
		son cor, ab qu'en fossetz iratz,
	30	car pauc notz aman desamatz.
IV		Laissat vos ay lo sordeior,	[Coms d'Astarac]
		Guiraut, si·l ver en volete dir,
		car tan vieuretz vos en error,
		pus ela no·us pot abelir
	35	ni ren de son lengatje:
		ans, pus sos vezers vos desplatz,
		coven tot jorn estetz clucatz.
		Et yeu ab alegratje
		servirai trastot la n'en patz,
	40	car mens d'afan cre que·m n'er datz.
V		Dels afans avetz lo maior,	[Guiraut]
		senh'en coms, ab peys de languir,
		car servetz leys, c'a deshonor
		se ten vos e·l faitz peitz d'aussir;
	45	abduy faytz breu viatje
		tot l’an, e car la tormentatz,
		faitz peytz que si l'ausiziatz,
		c'ap serpens de boscatje
		cug esser. Doncx mens mal n'agratz
	50	sie·us ames, tant braus no·l foratz.
VI		Guiraut, per pec razonador	[Coms d'Astarac]
		vos tenc c'a lieys cargue·s martir,
		car vos sostenretz la langor
		e·l mal c'a lieys mandatz sofrir,
	55	c'ap descortes barnatje
		estaretz ab lieys tant de latz
		que semblar n'es mal ensenhatz
		e senes tot paratje;
		et yeu soi tot jorn sos privatz,
	60	per que n'ay lo mens mal, sapchatz.
VII		Senher, d'un pauc vos desviatz,	[Guiraut]
		qu'esser non podetz sos privatz,
		tal vos a fel coratje;
		e prec que no·n jutje·l senatz
	65	Senher de la Yla, si·l platz.
VIII		Guiraut, soven serai mandatz	[Coms d'Astarac]
		per sos obs, segon que·m comtatz,
		pus non avem messatje;
		e vuelh ben que·ns jutje viatz
	70	mosenh'en Jordan, qu'es ondratz.