Serra-Baldó, Alfons. Els trobadors. Barcelona: Barcino, 1934 (2a ed. 1998).

Codi: 156,015 Autor: Folquet de Marselha Gènere: Alba religieuse Número: XXXII

 

Vers Dieus, e·l vostre nom et de sancta Maria

		[ALBA*]
I	1	Vers Dieus, e·l vostre nom et de sancta Maria
		m’esvelharai hueimais, pus l’estela del dia
		ven daus Jerusalem, que m’ensenha qu’ieu dia:
		estatz sus e levatz,
	5	senhor que Dieu amatz!
		que·l jorns es aprosmatz
		e la nuech ten sa via;
		e sia·n Dieus lauzatz
		per nos et adoratz;
	10	e·l preguem que·ns don patz
		a tota nostra via.
		La nuech vai e·l jorns ve
		ab clar cel e sere
		e l’alba no·s rete,
	15	ans ven bel’e complia.
II		Senher Dieus que nasques de la verge Maria
		per nos guerir de mort e per restaurar via,
		e per destruir enfern que·l diables tenia,
		e fos en crotz levatz
	20	d’espinas coronatz
		e de fel abeuratz,
		senher, merce vos cria
		aquest pobles onratz;
		qu’elh vostra pietatz
	25	lor perdon lor peccatz.
		Amen, Dieus, assi sia.
		La nuech vai e·l jorns ve
		ab clar cel e sere
		e l’alba no·s rete,
	30	ans ven bel’e complia.
III		Qui no sap Dieu pregar obs es que o aprenda
		et auja qu’ieu dirai et escout et entenda:
		Dieus, que comensamens es de tota fazenda,
		laus vos ren e merce
	35	del amor e del be
		que m’avetz fach encse;
		e prec, senher, que·us prenda
		gran pietatz de me
		que no·m truep ni·m malme,
	40	ni m’engane de re
		diables ni·m surprenda.
		La nuech vai e·l jorns ve
		ab clar cel e sere
		e l’alba no·s rete,
	45	ans ven bel’e complia.
IV		Dieus, donatz mi saber et sen ab qu’ieu aprenda
		vostres sanhs mandamens e·ls auja e·ls entenda,
		e·l vostra pietatz que·m gueris que·m defenda
		d’aquest segle terre
	50	que no·m trabuc ab se;
		quar ie·us ador e·us cre,
		senher, e·us fauc ufrenda
		de me e de ma fe,
		qu’aissi·s tanh e·s cove;
	55	per so vos crit merce
		e de mos tortz esmenda.
		La nuech vai e·l jorns ve
		ab clar cel e sere
		e l’alba no·s rete,
	60	ans ven bel’e complia.
V		Aquel glorios Dieus que son cors det a venda
		per totz nos a salvar prec qu’entre nos estenda
		lo sieu sant Esperit que de mal nos defenda,
		e d’aitan nos estre
	65	josta lo sieus nos me
		lai sus, on si capte
		e·ns meta dins sa tenda.
		La nuech vai e·l jorns ve
		ab clar cel e sere
	70	e l’alba no·s rete,
		ans ven bel’e complia.
		(Text de Stroński)