Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 330,012 Autor: Peire Raimon de Tolosa Gènere: Canso Número: CVII

 

Pois lo bels temps renovella

I	1	Pois lo bels temps renovella
		e fai de novel renverdir
		tot qant es, voilh de novel dir
		c'uns novels volers m'apella
	5	e·m di qe chant novellamen
		d'un gen cors novel avinen,
		a cui      me sui      de novel ferm fermaz,
		qar sui      per lui      de nou renovellaz.
II		Ben renovellet la bella
	10	mon gen cors el gent acuillir
		qe·m fes gen, per q'ades consir
		qon gen fins prez la capdella
		e com a gen acuillimen.
		ma del cors mon fin cor trai gen
	15	(sens brui      refui      gen), qe, si·m plac, no·m plaz
		desdui      d'autrui,      sí·m lia ab gen laz.
III		Tant l'am qe·l cors me travelha
		amors e·m fai lo cor languir.
		e si·m vol far aman morir
	20	amors, q'enaisi·m martella,
		far o pot, tant am fermamen
		lei, qe aman me et mon sen
		destrui.      q'abdui      l'aman, pres traenz traz.
		q'ab glui      m'estui, tan l'am ab gran senz graz.
IV	25	Grat li·n sai qar es isnella
		e sap grat dels pros retenir
		e·s fai gradan son prec grasir,
		e grat, qar aissi·m cenbella,
		qar, s'ab lei trob merce grasen,
	30	grat n'aura, e merces eissamen
		sen trui      s'endui      leis ab grat, on iois latz,
		per cui      relui      ab grat rics prez presatz.
V		. . . . . . . . . . . . . valent
		del Bauz, il et el eissamen,
	35	don cui      sens trui      cerz prez s'es enteratz
		en lui,      per cui      viu prez d'onor onraz.