Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 443,002 Autor: Torcafol Gènere: Sirventes Número: CXXXIII

 

Comunal, en rima clausa

I	1	Comunal, en rima clausa,
		on ia no·m respondrez, so·m cuich,
		farai serventes adora,
		e dirai vostra semblanssa,
	5	c'ab armas es soven vencuz;
		et hom viellz, puois desfivella
		ni es de toz prez abatuz,
		be·m meraveill com se feing druz.
II		Be·us n'endrues per la rausa;
	10	mas qui torna a maison, no fuch;
		molt lai issis en mal'ora,
		c'a pauc apchiers no·us fo Franssa,
		on parlon aissi cum porcs ruz.
		primiers comtes la novella,
	15	ses colp enchauzaz e vencuz,
		e fo ben messagiers crezutz.
III		Nuills ordes ab vos non pausa;
		pero, si·s defendesson tuch,
		ia negus dans no lur fora,
	20	qe . . . . . . . . . . . . . .
		raubes, e s'anc monges tonduz
		preiet dieu dinz sa chapella
		que·l demostres de vos vertuz,
		ara i es ben avenguz.
IV	25	Nuillz om q'ab vos an, non ausa
		far tornas, mas ades se·n fuich
		pel mal qe·l poples vos ora.
		e qant prendez vostra lanssa,
		es tres, vos et ill e·l escuz,
	30	e catre ab un'avol sella,
		ab no sai qanz archiers menuz
		ab roncins magres mal pazuz.
V		Puois fezes la laida causa
		on maint home foron destruch,
	35	anc puois dieus tart ni ab ora
		no cre volgues vostr' onranssa,
		ans n'es de prez decazeguz,
		q'a Roma a ccarta novella
		de mil brusaz, part los penduz,
	40	e mais de dez mongues barbuz.
VI		Puois los paubres . . . . .
		raubes dels moltonez veluz;
		ara·us vau als pechaz menuz.