Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Codi: 156,002 Autor: Falquet de Romans Gènere: Canso Número: V

 

Aucel no truob chantan

I	1	Aucel no truob chantan
		ni no vei flor novella,
		mais ieu no·m laiss de chan
		ni de joi qi·m n’apella,
	5	q’en joi hai tot mon cor,
		q’hom no sai qoras mor
		e ma domna·m te let
		q’ab joi plagen
		mon fi cor gazaignet ;
	10	per q’ieu li·m ren,
		q’ainch puois no fui ses joi noit ne dia.
II		De joi deu far scemblan
		qui fin’amors capdella,
		per q’ieu fach son coman,
	15	qar tan gen me cembella
		q’en tal hai mess mon cor
		c’onors m’er si lai mor ;
		qe s’amors me naffret
		tan douchamen
	20	q’insz en mon cor m’intret,
		jogan, riszen ;
		totz soi sieus, q’aissi foss ella mia !
III		Tan l’am de bon talan
		qe·l cor me ressautella ;
	25	qez ainch no amet tan
		Tristanz Ysolt la bella ;
		q’ieu sai de mon fin cor,
		qe per sobramar mor,
		q’ainch mais hom no amet
	30	tan coralmen
		ni meillz no atendet
		son joi soffren,
		q’aissi conqer amichx bon’amia.
IV		Qi m’en vol tener dan
	35	haia en son oill postella,
		q’ieu hai temencha gran
		qan nigus li favella ;
		domna, haiasz chai·l cor,
		qe·l mieus es lai qe mor,
	40	q’ainch u jor no·m loignet
		vostre cors gen
		ni re no desziret
		tan coralmen ;
		lass ! ar crei qe lo deszirs m’aucia.
V	45	A l’emperador man,
		pos valors renovella,
		qe mov’ab esfortz gran
		contra la gen fradella
		ez haia en Dieus son cor,
	50	qe sarrazi e mor
		han tengut li destret
		trop lonjamen
		la terra on Dieus nasqet
		e·l monumen,
	55	e taing be qe per lui cobrat sia.
VI		Richx hom q’es d’avol cor,
		fai be lo jor qe mor
		e son n’alegr’e let
		fil e paren,
	60	q’aicho q’el amasset
		parton rien :
		gardasz si fai foldat qi s’i fia.
VII		N’Oth del Caret, bo cor
		havesz on presz no mor,
	65	q’ainch nuillz bars no reignet
		plus franchamen
		ni genchers no onret
		home valen,
		per q’ieu am la vostra seignoria.