Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Codi: 437,012 Autor: Sordel Gènere: Canso Número: V

 

Dompna, meillz q'om pot pensar

I	1	Dompna, meillz q’om pot pensar
		leials e fins ses cor vaire
		m’autrei per totz temps amar
		vos, a cui non aus retraire
	5	mos mals, per q’eu muor temenz;
		qar e·us am tan coralmenz,
		qe, si·us plaz o no vos plaz,
		vostre serai tro al morir:
		qar totas autras amistatz
	10	met per vostr’ amor en air.
II		Plus no·m poc Amors honrar
		qan me fez ves vos atraire,
		qe anc Deus non volc formar
		gensor dopna, a mon veiaire,
	15	qe·l cors a dreg e plazen,
		cara douza e rizen,
		e natural la beltatz,
		e·l cor ses voler de faillir:
		per q’en vostra merce sui datz
	20	a totz vostres manz obezir.
III		E si·m fai ren desirar
		amors, qe non deiatz faire,
		per merce vos voill pregar
		qe no·m fassatz pauc ni gaire;
	25	qar mais am viur’ ab turmenz
		qe vostre prez vailla menz,
		dopna, per re qe·m fassatz;
		q’asatz ai de vos, cui dezir,
		sol qe de bon cor me suffratz
	30	qe vos posc’ amar e servir.
IV		Tan vos fai bel remirar,
		plazens dopna e de bon aire,
		q’ ab fin joi non puosc estar
		pos sui loing del douz repaire
	35	on es vostre nous cors genz;
		anz isco d’ entre las genz
		toz sols, soven, apensatz,
		e vos, dopna, pensan, remir.
		Per q’es per mi qe·us airatz,
	40	qe·m tol pessamen e consir?
V		Ja nuills temps no·m poiretz far,
		pros dompna, tan de mal traire,
		q’eu no·s si’al merceiar,
		pos de vos no·m puosc estra[i]r[e],
	45	q’amors me forza, e me venz
		vostra beltatz, e mos senz
		me diz qe·m tengn’a pagatz
		de tot qan volretz far ni dir;
		e si vos platz qe m’ausiatz,
	50	ja Deu mercei a mon fenir.
VI		En vostra merce sui datz,
		dopna, per viur’e per morir,
		e, si vos platz qe m’ausiatz,
		ja Deus no·m sal s’eu voill garir.