Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Codi: 437,036 Autor: Sordel Gènere: Canso Número: XII

 

Tos temps serai ves amor

I	1	Tos temps serai ves amor
		fis e ferms ab cor veray,
		qu’amar e servir mi fay
		la plus bella e la melhor;
	5	e, si tot als no m’enansa,
		tant creys sos pretz ab honor
		qu’ieu prenc per paya l’onransa;
		quar gent es de sidons payatz
		totz fis amans qu’es en sidons honratz.
II	10	E s’ieu anc sofri dolor
		per amor, ni·m det esmay,
		eras m’o torna en jay,
		per que·l fenisc ma clamor;
		qu’en tan bel plazer m’enansa
	15	ab fin joy lieys cuy azor,
		qu’ades viu ab alegransa
		quant mi pes qu’ieu serai amatz,
		si·lh pren d’amar negus temps voluntatz.
III		Mas de lieys no·m don temor
	20	que de so que pus mi plai
		no·m desvede, son cors guay;
		que, quan ve el mirador,
		la gran beutat que l’enansa,
		remembran son pretz aussor,
	25	tem que non denh penr’esmansa
		qu’a negun tanha s’amistatz:
		tant es sos pretz ricx, e granz sa beutatz.
IV		Deziran torn en error
		soven, quar tan luenh m’estay
	30	delhs huelhs e pres del cor, sai;
		pero, si tot planc e plor,
		quar vey pauc lieys que m’enansa
		al sieu plazer, m’alegor
		qu’ades remir per semblansa,
	35	on qu’estia, son cors e sa fatz:
		mas ben m’agr’ops que·l semblans fos vertatz.
V		Que quan remir sa color,
		que par flors ab neu quan chai,
		e·l gen cors qu’a vida·m trai
	40	e sa gran valen valor,
		de lieys per cuy pretz s’enansa,
		res no·m falh ni·m fai paor,
		ans n’ai tan gran benanansa
		e tan de joy, e tan me platz,
	45	qu’ieu poiria far jays totz los iratz.
VI		La valen[s] dona s’enansa
		de Mison ab tal valor,
		qu’entre nos viu ses eguansa
		de fin pretz, a laus dels prezatz,
	50	salvan s’onor de lieys cuy mi suy datz.