Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Codi: 206,002 Autor: Daspols Gènere: Planh Número: IV, 1

 

Fortz tristors es e salvaj' a retraire

		DASPOLS (f. 12).
I	1	Fortz tristors es e salvaj’ a retraire
		Qu’ieu chant am joy de tan coral dolor
		Con n’es li mort del rei nostre seinhor
		Francs de Fransa, de fin pres emperaire ;
	5	E per so chant ieu marrit e joyos
		Car Dieus lo volc mais a si que a nos,
		Car el s’era tost datz a luy servir,
		Qu’estiers sa mort Dieus nos volgra sufrir ;
		Per qu’es majers le dans el desconort[z]
	10	Car ieu aug dir quel rey de Fransa es mort[z]
		Ai Dieus ! Cals dans es !
II		Mortz est li reys, mas ieu non puecs retraire
		Lo dans c’a pres crestiantat nil plor,
		Car ses guovern viven e ses pastor.
	15	Capdel nos Dieus qu’es poderos e payre !
		Que, s’el reis es al regne glorios,
		Nos a laissat an gran trebaill say yos,
		Per que nom pot l’ira del cor yssir ;
		E car non puesc lo rey morent seguir
	20	Es ma dolors plus corals e plus fortz,
		Car vieu forsatz e nom deinh ausir mort
		Ai Dieus ! Cals dans es !
III		Sancta glizeiza, anc mort nos poc sostraire
		En aquest mont plus lial servidor
	25	Que eral rei, e Dieus fel tan d’onor
		Qu’en ben a far non tardet pauc ni guaire,
		Quel cor el cors el sen els compainhons
		Mes a servir de la cros e de nos.
		E Dieus, que venc per nostra mort ausir
	30	Sus en la cros, vuella mos precs auzir
		C’al rey perdon sos naletz e sos tortz,
		Que grans bens es perdutz car el es mortz
		Ay Dieus ! Cals dans es !
IV		Le mal nil dan non pot lengua retraire, (vº)
	35	Per que cascuns devem viure am paor,
		C’ades pren mort del mont so qu’es milhor
		Quens a sostrah le franc rey de bon ayre ;
		Car si visques l’onrat[z] reys corayos
		Tost foron mort(z) Sarazin(s) ergulhos,
	40	C’a totz fera terras e fieus giguir
		E Baffomet reneguar e grepir ;
		Ens obrira totz los camins els portz.
		Guardas de quan nos a mermat[z] sa mortz !
		Ay Dieus ! Cals dans es !
V	45	Francs reys, per vos, si deu de joy estraire
		Crestiantat tant cant hom cros aor,
		Li clerc el laic e l’orde el doctor
		E non n’escurs sor ni cozin ni fraire,
		Quel mercadier e l’avers, von que fos,
	50	Era segurs de glotz e de layros,
		Per que nos deu l’ira del cor partir
		Tant can vieuran ; et ieu quan me consir
		Cals er ni qui sel quens avie estort[z],
		Ma vida pres trop mens que s’era mort[z].
	55	Ai Dieu ! Cals dans es !
VI		Francs reys Felips, nuls nom non deu estraire
		De ben a far tant cant n’aura vigor,
		E non creiretz lauzengier ni trachor
		Se resemblas Loloïc(z) vostre paire,
	60	Qu’el era francs e fis et amoros
		E lial[s] reis e drechuries e pros ;
		Vos non volretz escoutar ni auzir
		Fals conceilhiers ni lor lenguas grazir,
		Ans tenres dreg als freols contrals fortz,
	65	Pueis non er pres en vos delitz ni mortz.
		Ai Dieus ! Cal dans es !
VII		Sel Dieus qu’el mont venc per cors uman traire
		De la Verges, domna, per vostr’amor,
		Meta l’arma del rey, per sa dousor
	70	En onrat luoc pres leis que l’es per maire.
		Em paradis, entrels sieus amics bos,
		Qu’el visquet say misericordios
		Al servize de Dieu e i volc fenir ;
		Per que podem lauzar sens contradir
	75	Totz sos bos fatz, calque sial conort[z],
		C’a totz fizels vius deu pezar sa mort[z].
		Ai Dieu ! Cals dans es !
VIII		Mon play faray a Posquieiras auzir,
		Car a Valvert fa Jhesu Crist grazir
	80	Nostra domna ; e Dieu perdon sos tortz
		A Loloïc, le rei(s) frances qu’es mortz.
		Ai Dieu ! Cals dans es !