Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Codi: 259,001 Autor: Jacme Mote d'Arle Gènere: Sirventes Número: VII

 

Non es razons qu'ieu deg' aver pereza

		EN JACMES MOTE D’ARLE (f. 16 v°).
I	1	Non es razons qu’ieu deg’ aver pereza,
		Senien prinse, de far .j. sirventes,
		C’als volontatz s’es dedins mon cors meza ;
		Per quel faray, c’aras veg que luoxs es
	5	De chantar qui talent n’auria,
		Car joy e pres e cortezia
		Nos restauret[z], seinher prinse, per ver
		Lo premier jorn que nos vengest vezer.
II		Mortz era joys, solas e alegreza
	10	En Proensa enans que say fosses ;
		Aras nos a la vostra gentileza
		Restauratz tos e cregutz de totz bes,
		Car tals ris que plo[r]ar solia
		E tal[s] n’er rixs que pauc avia ;
	15	Per que trastut(z), seinher, devem aver
		D’ostre venir sertas gaug e plazer.
III		Per vils cusons, malvatz, plens de falseza
		Siam aunit(z), vil(s) tengut(z) e mespres ;
		Sufert avem pron d’anct’e de vileza,
	20	Ben era d’ops, seinher, que say vencses,
		C’om nos raubav’ e nos batia.
		E Dieus com sofrir o podia ?
		Que sill qu’eran pauzat per dreg tener
		Eran permier a tolre nostr’ aver.
IV	25	Tostems dizon que bona jent corteza          (f. 17)
		A le seinhers cant es bons e cortes ;
		De mal seinhor vei sa jent qu’es apreza
		E mal a far e mal dir totas ves ;
		E de sell(s) quel[s] sieus non castia
	30	Cant sap qu’el fan ren que mal sia,
		Creire pot hom qu’el no’n a desplazer
		Pos jentz sufre que son de fol voler.
V		Si beus pensatz, seinher, la gran nobleza
		D’ostre paire nils fatz qu’en Poilla fes,
	35	Per dreg deves aver valor conqueza ;
		E vostr’ avi coven que resembles,
		Quel pros coms Berenguier fazia
		Tot so que a fin pres tainhia ;
		Per que es dretz que vos dejas valer
	40	Sobre totz cels c’aras tenon poder.
VI		Ab tener dreg ez ap far lialeza
		Creison lo lur aquist seinhor(s) franses,
		Esquivant tort e peccat e maleza ;
		E vos, seinher(s), creiseres n’a pales,
	45	Car sertas lial seinhoria
		Creis a totz jorns e multiplia ;
		E sill que fan als sieus contra dever
		Per lur erguell devon d’aut bas chaer.
VII		Lo fill la verge Maria
	50	Prec queus lais complir tota via
		A sa honor tot vostre bon voler,
		Eus lais vieure lonc temps a son plazer.