Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 293,030 Autor: Marcabru Gènere: Pastorela Número: I

 

L'autrier, jost' una sebissa

I		L'autrier, jost' una sebissa,
		Trobei pastora mestissa,
		De joy e de sen massissa;
		E fon filha de vilana:
	5	Cap'e gonel'e pelissa
		Vest e camiza treslissa,
		Sotlars e caussas de lana.
II		Ves leis vinc per la planissa:
		« Toza, fi m'eu, res faitissa,
	10	Dol ai gran del ven que·us fissa ».
		— « Senher, so dis la vilana,
		Merce Deu e ma noyrissa,
		Pauc m'o pretz si·l vens m'erissa
		Qu'alegreta sui e sana ».
III	15	— « Toza, fi·m eu, causa pia,
		Destoutz me suy de la via
		Per far a vos companhia,
		Quar aitals toza vilana
		No pot ses plazen paria
	20	Pastorgar tanta bestia
		En aital luec, tan soldana! ».
IV		— « Don, dis ela, qui que·m sia,
		Ben conosc sen o folia;
		La vostra parelharia,
	25	Senher, so dis la vilana,
		Lai on se tanh si s'estia,
		Que tals la cuj'en bailia
		Tener, no n'a mas l'ufana! ».
V		— « Toza de gentil afaire,
	30	Cavaliers fon vostre paire
		Que·us engenret en la maire,
		Tan fo·n corteza vilana,
		C'on plus vos gart m'etz belaire,
		E per vostre joy m'esclaire,
	35	Si fossetz un pauc humana! ».
VI		— « Senher, mon linh e mon aire
		Vey revertir e retraire
		Al vezoig e a l'araire.
		Senher, so dis la vilana,
	40	Mas tals se f ai cavalgaire
		C'atrestal deuria faire
		Los seis jorns de la setmana ».
VII		— « Toza, fi·m eu, gentils fada
		Vos adastret, quan fos nada,
	45	D'una beutat esmerada
		Sobre tot' autra vilana.
		E seria·us ben doblada
		Si·m vezi' una vegada
		Sobiran e vos sotrana ».
VIII	50	— « Senher, tan m'avetz lauzada
		Pois en pretz m'avetz levada,
		Qu'ar vostr' amor tan m'agrada,
		Senher, so dis la vilana,
		Per so n'auretz per soudada
	55	Al partir « bada, fol, bada »,
		E la muz' a meliana ! »
IX		— « Toza, felh cor e salvatge
		Adomesg' om per usatge.
		Ben conosc, al trespassatge,
	60	Qu'ab aital toza vilana
		Pot hom far ric companhatge
		Ab amistat de coragte,
		Quan l'us l'autre non engana ».
X		— « Don, hom cochatz de folatge
	65	Jur' e pliu e promet gatge.
		Si·m fariatz homenatge;
		Senher, so dis la vilana,
		Mas ges, per un pauc d'intratge
		No vuelh mon despiuzelhatge
	70	Camjar, per nom de putana ! ».
XI		— « Toza, tota creatura
		Revertis a sa natura:
		Parelhar parelhadura
		Devem, eu e vos, vilana,
	75	A l'abric lonc la pastura,
		Que mielhs n'estaretz segura
		Per far la causa doussana ».
XII		— « Don, oc; mas segon dreitura
		Cerca fols la folatura,
	80	Cortes cortez' aventura,
		E·l vilas ab la vilana;
		En tal loc fai sen fraitura
		On hom non garda mezura,
		So ditz la gens anciana ».
XIII	85	— « Belha, de vostra figura
		No·n vi autra plus tafura
		Ni de son cor plus trefana ».
XIV		— « Don, lo cavecs vos ahura,
		Que tals bad' en la peintura
	90	Qu'autre n'espera la mana! »