Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Codi: 269,001 Autor: Joan de Pennas Gènere: Tenson fictive Número: XI

 

Un guerrier per alegrar

		JOHAN DE PENNAS. (f. 26 v°)
.viij.
I	1	Un guerrier per alegrar
		Vuelh comensar car m’agensa,
		Que non lo dey plus celar,
		Trop l’auray tengut en pensa ;
	5	E guer[e]jaray d’amor
		En domens que ma guerieira
		A trobat guerejador
		Que guereja volontieira.
II		— Guerier, ben vuelh guerejar
	10	Ab vos d’amor ses failhensa,
		Car sapchas non puesc trobar
		Hom(s) de mïlhor entendensa
		Ni sia plus fin aimador
		Ni mielh sapcha la karieira
	15	De ben amar per amor,
		Ni tengua sa laus entieira.
III		— Guerieira, sobrelauzar
		Mi voles per benvolensa ;
		Ben vos vuelh dir ses duptar
	20	E jur vos per ma crezensa
		Que vos est de beutat flor,
		Que non say hon ieu mi quieira
		En Tharascon bellazor
		Que miels del dart d’amor fieira.
IV	25	— Mon guerier, cortes d’amar,
		Sapchas que gran penedensa
		Sufri car nous aus mostrar
		L’amistat gran de valensa
		Qu’ieu vos port, car gran secor
	30	Mi fora, si la manieira
		Non fos del(s) lauzengador
		Maldizen(s), qu’es trop sobrieira.
V		— Ma guerieira am pres clar,
		Plena de gran conoissensa,
	35	Non vulhas per so laisar,
		Qu’ieu suy en vostra plevensa ;
		Car qui ama a sa honor
		Lialmens ni vertadieira
		Non deu pas aver temor
	40	De presona lauzengieira.
VI		— Guerier, per vostra valor
		Vos seray lial guerrieira,
		Car vos portas per lauzor
		De savia la bannieira.