Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 242,044 Autor: Giraut de Bornelh Gènere: Pastorela Número: II

 

L'autrier, lo primier jorn d'Aost

I		L'autrier, lo primier jorn d'Aost,
		Vinc en Proensa part Alest,
		E chivauchava·m, semblan mest,
		Qu'ira·m tenia sobrieira,
	5	Quan auzi d'una bergieira
		Lo chan, just' un plaissaditz.
		E, quar fon suaus le critz
		Don retendi la ribieira,
		Vau m'en lai totz esbaytz,
	10	On amassava faujeira.
II		E, sitot s'avia pel brost
		Estrecha·l gonelha que vest,
		Ans que li demandes « d'on est? »,
		Ela·m tenc a l'estrubieira;
	15	Pueis dis me: « per cal dressieira
		Vengues ni don es issitz?
		Ja·m sembla siatz marritz;
		No m'ajatz per trop parlieira,
		Que, quar es sols, escharitz,
	20	Ai ben drech que vos enqieira. »
III		— « Toza, be·us dirai can que cost,
		Pus tan gen m'en avez enquist,
		Quals aventura·m mena trist:
		De bon' ami' ay netsieira
	25	Que fos fin' e vertadieira,
		Qu' eras me sui departitz
		D'una fals' abetairitz
		Que·m fa camjar ma carrieira,
		E fora·m capdels e guitz
	30	Si no fos tan volatieira ».
IV		— « Senher francs, ja qui que s'ajost
		Ab ric' amor non er, per Crist,
		Sitôt s'a pro auzit e vist,
		Ses clam; qu'una cavalieira
	35	Vol ben qu'om on fag li mieira
		Sos bes e·l mals si' oblitz;
		Qu'ades no·n siatz garnitz
		Tornara·us d'autra manieira!
		Qu'estas autras camjairitz
	40	Segon tost autra carrieira ».
V		— « Toza, Dieus vuelha qu'elha m'ost
		Del mal que tanta pena·m bast
		E·n perda·l dormir e·l depast!
		Mas vos, ab la senha nieira,
	45	Non crezatz que pus vos qieira.
		Per so qar gen m'aculitz,
		Vos serai francs e chauzitz;
		Quar coven que·us en refieira
		Merces quar no·us en fugitz:
	50	De lonh m'avisetz primieira ».
VI		— « Senher, be m'agra ops drutz que·m sost
		Del fag, qu'enqueras loc non tast,
		Que'l cors ai pauc e de sen cast,
		(Si be·us mi fas prezentieira)
	55	Pueis cug segon ma paubrieira
		Que'm sia datz bos maritz.
		Mas, quar tan pauc m'enqueritz,
		Farai d'aitan que leugieira,
		Qu'ab fis sagramens plevitz
	60	Auretz m'amistat entieira ».
VII		— « Toza, be·n fora gauzitz,
		Mas tant es ferma· l razitz
		Que mou de lai, part Lobieira,
		Que· l mals, pus s'es endurmitz,
	65	Ai paor que pieitz mi fieira ».
VIII		— « Senher, ges non es arditz,
		Quar del mal que·us es fugitz
		Temetz que pueis vos enqieira.
		Mas, pus tan m' es abelhitz,
	70	Sojornem en est' ombrieira ».
IX		— « Toza, N'Escaruenh' es guitz
		De pretz, que·m det companhieira
		Cortez', e fin' amairitz,
		Per que·l mals me fug a tieira ».
X	75	— « Senher, un pauc es falhtz,
		Qu'eras d'autra companhieira
		Parletz que fossetz aizitz,
		Sitot s'es pus ufanieira ».