Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori
* Bibliografia de l'edició
* Glossari
* Rimari
* Observacions

* Davantal
* Bibliografia
* Testimonis
* Aparat crític
* Notes
* Traduccions
* Imatges

 

Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Codi: 156,II Autor: Falquet de Romans Gènere: Preghiera Número: XVII

 

Senher Dieu que fezist Adam

 
1
Senher Dieu que fezist Adam
   
e assagiest la fe d’Abram
   
e denhest penre carn e sanc
   
per nos, tant fust humils e franc,
 
5
pueys lieuriest ton cors a martire,
   
don mos cors en pessan m’albire
   
que trop fezist d’umilitat
   
segon ta auta poestat,
   
Dieu Jhesu Crist, filh de Maria,
 
10
Senher, mostra·m la drecha via
   
e no·y esgartz los meus neletz
   
e retorna·m als camis dretz !
   
Hueymay be·s tanh qu’ieu m’en descobra
   
tant ai estat en mala obra :
 
15
tostemps amey gran avareza
   
e tenc mon cor en cobezeza,
   
voluntiers ajustiey vas me
   
e non ges tot per bona fe ;
   
volontiers amassey l’autrui
 
20
e non gardey ni qual ni cuy ;
   
e fuy tostemps de malenconi
   
e mantinc obra de demoni,
   
can me venc en cor que·m partis
   
e que a tu, ver Dieu, servis.
 
25
Peccatz m’azauta que·m refresca,
   
que m’es pus dos que mel ni bresca,
   
e retorna·m al recalieu,
   
que m’es salvatje et esquieu,
   
tan me sobro peccatz mortals.
 
30
Si tu, vers Dieu, doncx no m’en vals,
   
tant es cozens lo mal que·m toca
   
que no·l puesc comtar ab la boca,
   
ni metje no m’en pot valer
   
si tu no·m vals per ton plazer.
 
35
Glorios Dieu, per ta merce,
   
dressa ta cara devan me
   
e remira lo greu trebalh
   
c’aissi·m tensona e m’assalh,
   
que·ls mieus peccatz no son per nombre ;
 
40
per tal, tem que la mort m’encombre,
   
que·ls mieus peccatz son massa trops
   
e·l tieu cocelh m’a mot gran obs.
   
Gran merce·t clam com hom vencut
   
que m’ajutz, Dieu, per ta vertut,
 
45
qu’en peccat soy natz e noirit
   
et en peccat ai tan dormit
   
c’a pena vey la clara lutz
   
que·l tieu Sant-Esperit m’adutz ;
   
en escur vauc com per tenebras,
 
50
malautes suy pus que de febras,
   
en caitivier jac et en pena
   
e tenc al col tan gran cadena
   
que totz soy pesseiatz e franhs,
   
tan fort es dura e pezans.
 
55
Glorios Dieu, senher del tro,
   
si·t platz, deslieura·m de preio ;
   
ab gran dolor t’apel et crit,
   
Senher, no·m metas en oblit.
   
Oblidat m’as per ma folor,
 
60
car no·t servi coma senhor,
   
e soi pus freg que neu ni glas
   
can me parti del tieu solas.
    Glorios Dieu, dona·m calor
   
e sen e forsa e vigor
 
65
e conoissensa e saber
   
q’eu te serva a ton plazer.
   
Senher Dieu, fay nede mon cor,
   
de totas partz dins e defor,
   
de tota mala volontat
 
70
e d’erguelh e de malvestat,
   
e retorna·m al tieu servizi
   
e salva·m al jorn del juzizi.
   
Glorios Dieu, tramet me lum
   
que·m get dels huelhs aquel mal fum,
 
75
aisi que sian bels e clars
   
que no sian durs ni avars,
   
e reconosca·ls tieus sendiers
   
c’aisi son plas e drechuriers,
   
qu’ieu res no vey ni say on so,
 
80
ans prenc lo mal e lays lo bo.
   
Senher Dieu, garda·m dels camis
   
que la mortz trob’a tan mesquis
   
e de lur gran desaventura
   
dels enemicx, que es tan dura.
 
85
Dieu, perdona me en ma vida
   
totz mos peccatz e ma falhida,
   
ans que la mortz me sobrevenga,
   
can non poirai menar la lenga,
   
car penedensa del adoncx
 
90
no val a l’arma .iiij. joncx.
   
Ajuda·m, Dieu, tost, no m’o tricx,
   
car totz mos mortals enemicx
   
n’aurian gaug senes acort
   
si·m podian lieurar a mort.
 
95
Senher Dieu, mot m’o tenc a tala
    car ieu non truep genh ni escala
   
hon te pogues venir denan
   
lai sus on son li gaug e·l san.
   
Dieus, tu que fist tan bel miracle,
 
100
met me el tieu sant habitacle,
   
car tot mon cor e m’esperansa
   
es en la tua piatansa,
   
car pus greu comte que d’arena
   
port de pecat sus en l’esquena :
 
105
qu’el mon no sai hom tan deslieure
   
pogues totz mos peccatz escrieure.
   
Mas tu, Senher, vers Dieu, que saps
   
mos pessamens e totz mos abs,
   
a tu non puesc esser selat
 
110
cal fuy, cal soy, cal ai estat.
   
Tant ai peccat que no·n sai nombre ;
   
si anc fuy fols, aras soi, Dombre,
   
car pecat m’a cubert e clors
   
de totas partz me tenon mors.
 
115
Dieu, dona·m genh co m’en partisca
   
per so que·t laus e que·t grazisca,
   
car tu yest, Dieu, dos, amoros,
   
e Senher Dieu totz poderos.
   
Veray Dieu, dressa tas aurelhas,
 
120
enten mos clams e mas querelhas ;
   
aisi·t mourai tenson e guerra,
   
de ginolhos, lo cap vas terra,
   
las mas juntas e·l cap encli,
   
tan tro·t prenda merce de mi,
 
125
e lavarai soven ma cara,
   
per tal que sia fresqu’e clara,
   
ab l’aiga cauda de la fon
   
que nais del cors lai sus el fron :
    car lagremas e plans e plors,
 
130
so son a l’arma frutz e flors.
   
Senher Dieu, en tu ay mos precx :
   
en esta cocha no·m desnecx ;
   
ja soi ieu tos parens carnals
   
e tos parens esperitals,
 
135
ieu soi tos filhs e tu mos paire,
   
lo mieu senhor e·l mieu salvaire,
   
ieu soi tos filhs, tu mos parens :
   
aias de mi bos chauzimens ;
   
car ieu soi ples de tot peccat
 
140
e tu, Senher, d’umilitat ;
   
tu iest fort aut et yeu trop bas,
   
car peccat m’a vencut e las.
   
Dels enemicx me garda, Senher,
   
que·m volon dampnar e destrenher ;
 
145
ampara·m, Dieus, mos esperitz
   
ans qu’en sia del tot partitz
   
e dona·m vida eternal
   
el tieu regne celestial.
              Amen !

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI