Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 266,005 Autor: Joan Esteve Gènere: Pastorela Número: XVI

 

El dous temps quan la flor s'espan (1283)

I		El dous temps quan la flor s'espan
		Sus el verjan
		Ab la verdor,
		M'anava totz sols delechan,
	5	Del joi pessan
		Que·m ven d'amor.
		En un deves, anhels garan,
		Ieu vi denan
		Ab un pastor
	10	Gaya pastorella,
		Covinent e bella,
		Que vesti gonella
		D'un drap vetat belh
		E·l pastorelh.
II	15	Pres d'elhs me mis en loc rescos
		Que lunhs d'amdos
		No·m poc vezer;
		E·l pastora moc sas razos
		Cum gay'e pros,
	20	E dis: — « per ver,
		Gui, mon paire·m vol dar espos,
		Vielh, raynos,
		E ric d'aver. »
		— « Mal'er la chauzida,
	25	Dis Gui, si·us marida,
		Na Flors, e·us oblida
		Selh que per marit
		Avetz chauzit. »
III		— « En Gui, mos cors vos es volvens,
	30	Quar paupramens
		Vos vey estar. »
		— « Na Flors, paupre jov'es manens,
		Quan viu jauzens,
		Pus ses duptar
	35	Que·l vielh ric qu'es tot l'an dolens:
		Qu'aurs ni argens
		No·l pot joi dar. »
		— « En Gui, que que us aya
		Dig, amor veraya
	40	Vos port; no·us desplaya,
		Que fin cor veray,
		Amics, vos ai. »
IV		Del loc don los agui 'scotatz
		Vengui en patz
	45	Tro elhs, ses bruy;
		Baizan los trobiey, abrassatz,
		D'amor nafratz,
		Joy entr'amduy.
		Saludiey los; mas ver sapchatz
	50	Que saludatz
		Per elhs no fuy,
		E·l pastora blonda
		Dis, non jauzionda:
		— « Senher, Dieus cofonda
	55	Qui joc jauzion
		Tolh al belh blon. »
V		— « Na Flors, per que·us desplatz de mi,
		Mais quez a·N Gui
		Quar aissi so? »
	60	— « Senher, vos nostres noms cossi
		Sabetz aissi?
		Ans me sap bo. »
		— « Na Flors, tan pres era d'aissi
		Que·ls noms auzi
	65	E la tenso. »
		— « Senher, no·y fo facha
		Folhors, ni atracha. »
		— « Toza, qui s'en gacha
		De ben fay, atrag
	70	Qu'a tostemps fag. »
VI		Ma razo retracha
		Ses tota empacha,
		Parti·m de lur pacha;
		Non lur fi empag
	75	Pus, ni retrag. »
VII		En Guillem a facha
		De Lodeva gacha
		De valor antracha
		Per qu'ieu s'onor gach,
	80	Belh-Ray, be fach. »