Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 434,007c Autor: Serveri de Girona Gènere: Pastorela Número: XIX

 

Entre Lerid' e Belvis

I		Entre Lerid' e Belvis,
		Pres d'un riu, entre dos jardis,
		Vi ab una pastorela
		Un pastor vestit de terlis,
	5	E jagren entre flors de lis.
		Bayzan sotz l'erba novela.
		E anc pastora pus bela,
		Pus cuynda ne pus ysnela,
		No crey que fos, ne no m'es vis
	10	C'a mos oyls tan plazen ne vis
		En França, ne en Castela.
II		Gen m'esgardey lor bestiar,
		E vi l'a un sirven menar
		Qui als dos emblat l'avia,
	15	E comencey l'aut a cridar:
		« Laxatz lo, non podetz anar! »
		E· l sirven fetz n'a ma guia.
		E cant eu vi que· l fazia,
		Pris lo, qu'esters no·m plazia
	20	Que m'anes ab lui barayllar,
		E aney l'en un ort tancar.
		Puys torney lai d'on partia.
III		Can fuy tornatz el jardi,
		La pastora cridar auzi:
	25	« Ay! lassa, mal'anc fuy nada;
		Tots gauigs torn'en dol a la fi.
		Tan can mos amics fo ab mi,
		No·m cugey mays fos irada;
		Ay! douçors leu m'es passada,
	30	Ez en gran dolor tornada!
		Digatz, Seyner En Cerveri,
		Si vis mon bestiar el cami,
		Qu'eu lo·m tem de cavalgada ».
IV		— « Si·l bestiar c'avetz perdut,
	35	Na Toz' e·us avia rendut,
		Cal gazardon cobraria? »
		— « Seyner, de vos faria drut,
		E auriez lo·m car venut,
		Mas cutxos perden cambia! »
	40	Ensems tenguem nostra via
		Lai o·l bestiars paixia;
		E, can l'ac per seu conegut:
		« Seyner », fetz il, « Deus vos ajut!
		Anatz! Que re no·n faria ».
V	45	— « Toza, no·us estara gen
		Si·m trencatz vostre covinen ».
		— « Seyner, cauz' es costumada;
		No·us meraveylletz s'eu vos men,
		C'ab mi us n'an mentit may de cen,
	50	E son vos gen escapada.
		Pendre deu hom sa soldada
		Sempre que l'es autreyada;
		Car qui temps a, e temps aten,
		Pert son temps trop nesciamen,
	55	E femna es leu cambiada ».
VI		— « Na Toza, joy no m'agrada
		Ne jazers de femn' irada.
		S'agues joy, e vos marrimen,
		No fora cauza d'avinen,
	60	Mas era·m deu esser dada! »
VII		— « Seyner, caus'es desguiada
		Per forç' ab cutx' autreyada.
		No·s deu far, per qu'eu m'en repen;
		Pero vuyll n'auzir jutyamen
	65	De l'Enfan, on pretz s'agrada ».
VIII		— « A la Vezcomtesa plazen,
		Na Toza, de Cardona·m ren,
		C'amor no te pro, forçada ».