Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 270,001 Autor: Jojos de Toloza Gènere: Pastorela Número: XXI

 

L'autrier, el dous temps de Pascor

I		L'autrier, el dous temps de Pascor,
		En una ribeira,
		Aniey cercan novella flor
		Cost' una sendieyra;
	5	E per delieg de la verdor
		E quar es entieyra
		La bona fes qu'ieu port d'amor
		A ma vertadieyra
		Senti al cor una doussor,
	10	Et a la primeyra
		Flor qu'ieu trobiey, torney en plor,
		Tro qu'en un'ombreira
		Ieu reviriey mos huelhs alhor,
		Et una bergeira
	15	La vi, ab la fresca color,
		Blanca cum nevieyra;
		E son plus bel
		De nulh auzelh
		Siey huelh gentil,
	20	Humil,
		Que mil
		Qu'a vil
		Lau vezon, met el fil
		Et en la carrieyra
	25	De ben amar
		Ses mal estar;
		E qui lieys ve
		Sap be
		Desse
	30	Que re
		No·lh pot hom dir mas be,
		Tant es plazentieyra.
II		Et yeu, quan vi son gay cors gen
		D'avinent estatge
	35	E sa fresca cara rizen
		E·l sieu clar visatge,
		Oblidiey tot mon pessamen,
		Quar de gran paratge
		Mi semblet al ben fait, plazen
	40	Cors de gran barnatge.
		Et yeu mezeis suau e gen,
		Qu'anc no y vuelc messatge,
		Ves lieys m'en aniey humilmen.
		Et en l'aferratge
	45	Gardet tres anhels solamen,
		Et en mon coratge
		Yeu maldis qui primeiramen
		Baysset son linhatge.
		— « Toza, fi·m yeu,
	50	A Domnidieu
		Prec que·us ampar
		E·us gar
		De far
		Mal, quar
	55	Vos fe de ben, ses par,
		Ab cors d'agradatge;
		E de faillir
		Vos gar, quar dir
		Puesc ben de ver
	60	Que per
		Plazer
		Aver
		A selhs que·us van vezer,
		Vos fe ses follatge ».
III	65	Er aujatz avinen respos,
		Per fin cor sostraire,
		Que·m fes ab semblant amoros:
		« Amicx, de bon aire
		Mi semblatz, e cortes, e pros;
	70	Mas del vostr' afaire
		Sabrem, ans que·us lonhetz de nos,
		Si etz fis amaire;
		Mas primiers vuelh saber de vos,
		Qu'aissi·us vey mal traire,
	75	Lo nom, et estar cossiros,
		Ni de qual repaire
		Vengues. » Et ieu dissi cochos:
		« Leu m'es per retraire:
		De Tolza, et ai nom Joyos;
	80	No·m reverta gaire,
		Quar nulhs socors
		No·m ven d'amors,
		Ans muer aman,
		Celan
	85	Mon dan,
		Lauzan
		Midons, e sofertan,
		Qu'ieu am ses cor vaire;
		E ges no·m pes
	90	Qu'elha·m degues
		Aucir, ni·m veg
		Naleg,
		Ans deg,
		Per dreg,
	95	Virar de son destreg
		Mon cor et estraire ».