Appel, Carl. Der Trobador Cadenet. Halle a. S.: Verlag von Max Niemeyer, 1920.

Codi: 106,001 Autor: Cadenet Gènere: Canso Número: XXV

 

Ab leyal cor et ab humil talan

I	1	Ab leyal cor et ab humil talan
		venc vas Amor per mostrar mos greus mals
		qu’ieu ai sufertz grans e descominals
		per lo dous ris e l’amoros semblan
	5	que·m fetz midons al prim esguardamen,
		quan pres mon cor e mon fin pessamen,
		e suy mi mes el sieu ric senhoratge.
II		„A vos, Amors, vuelh mostrar en chantan
		quo·m pres midons, ni per que, ni per quals,
	10	ni on me mes sos homs fis e leyals.
		a pauc de be suy pres e malanan,
		on m’a tengut senes tot chauzimen
		non sol un an, ans crezatz certamen
		seran complit set ans al prim erbatge.
III	15	Tot suavet, Amors, mi venc denan,
		mostranels huelhs guays semblans e cabals
		et ab merce (quar non es hom carnals
		que ja pogues desviar mon talan
		per lo sieu ris que·m fes tan doussamen
	20	que·m fon avis, merce n’agues breumen.
		quar m’o cugei, conosc que fis folhatge).
IV		Qu’ieu la triey, segon lo mieu semblan,
		per la melhor de las autras reyals.
		et a tengut mon cors en sos ostals
	25	ab son ric pretz sobrels autres prezan.
		si quo·l solelhs sobr’autr’alumnamen
		nos ren clardat, ben puesc dir eyssamen
		qu’ilh es clardatz e rent alumenatge.
V		Lo dous cossir del belh cors benestan
	30	agreuja mout mas dolors e mos mals,
		que de plorar rendon mos huelhs venals
		per sa beutat, que m’es tot jorn denan,
		que per semblan m’auci en pessamen,
		per que conosc qu’aucir-m’a planamen,
	35	si·n breu vas me non domda son coratge.
VI		E doncs, Amors, fessetz per me aitan
		qu’en ben voler siatz ab me enguals,
		que·m destrenguatz midons d’aitan savals
		que·l sapcha bo, e m’en fassa semblan,
	40	quar ieu l’am mais de nulha re viven ;
		et avetz mi fag alegr’ e jauzen,
		quan ieu de lieys aurai pres senhoratge.“
VII		A Mon Dezir t’en vai, chanson, breumen,
		e di·l, si·l play, que per son chauzimen
	45	li sapcha bo que ieu l’am d’agradatge.