Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 206,003 Autor: Guilhem d'Autpol Gènere: Pastorela Número: XXII

 

L’autrier, a l'intrada d'Abril

I		L’autrier, a l'intrada d'Abril,
		Per la doussor del temps novelh,
		Per gauch del termeni gentil,
		M'anava sols per un pradelh;
	5	En un deves, prop d'un cortil,
		Trobey pastor'ab cors yrnel;
		Vestida fon d'un nier sardil
		Ab capa grizeta ses pelh;
		Bell'es e genta;
	10	S'amors m'atalenta,
		Tant es covinenta;
		E fes un capelh
		De flor ab menta;
		Sola si contenta
	15	Jost'un arborelh;
		Ab si meteyssa dish: « Ay!
		Sola suy e·l temps s'en vay!
		Lassa! be planc ma joventa
		Quar non ay amic veray. »
II	20	Yeu que vi son gay cors barnil,
		Saludiey la, quar mi fon belh,
		Et elha·m respos tost e vil,
		Co ssi fos dona de castelh:
		« Joglar, vos qu'avetz sen sotil,
	25	Trobatz qui·us onre ni·us apelh?
		Anc pueys qu'Amors perdet son fil,
		Pretz non ac valor ni capdelh;
		Ans s'espaventa
		Falsa gens manenta,
	30	S'om gays lor prezenta
		Solatz ni sembelh.
		Be·n suy dolenta,
		S'anc n'estiey jauzenta,
		D'amor que·m turmenta
	35	De jos mo sagelh.
		De ben amar no·m partray,
		Ni per tan no·m layssarai
		Qu'en totz plazers non cossenta
		A mon amic, quan l'auray. »
III	40	— « Na toza, pros et avinens
		Etz, e faitz de mi vostre drut!
		Qu'ie·us seray leyals e temens,
		E ja per mi no·n er sauput;
		E far vos ay nous vestimens
	45	Quant aja mon rossi vendut:
		E ja negus vostre parens
		No sabra don vos er vengut.
		Gans e sentura
		Per bon'aventura
	50	Vos port de mezura
		Ab frontal crocut;
		E si·l temps dura
		Auretz vestidura
		De brunet' escura;
	55	Mais, si Dieus m'ajut,
		Autras joventas no·n port;
		Mas ieu d'aisso vos conort
		Que d'amic seretz segura. »
		— « Senher, et yeu o vuelh fort.
IV	60	Joglar, grans es l'esernimens
		Qu'ie·us vey, et ay ben conogut
		Que, s'ieu complis vostres talens,
		Ja no·us agra de miey perdut;
		E, sitot s'es l'aculhimens
	65	Belhs, ni·us ay gay solatz tengut,
		S'ay marit, no m'autreya·l sens
		Qu'ieu ja·l fassa per vos cornut;
		Qu'ieu non ai cura
		D'amic ses dreitura,
	70	On peccatz s'atura
		De mala vertut;
		Ans, se melhura
		Mos faitz, en dossura
		No·m fara fraitura
	75	·l temps qu'ai despendut,
		Que fraire Johans ditz fort
		Que deliegz engenra mort;
		Yeu sent mi casta e pura;
		Per que·n faria a Dieu tort? »
V	80	— « Toza, si Dieus mi perdo,
		Trop sabetz mais de Cato,
		Qu'ieu no say plus greu fazenda
		Que servir ses gazardo. ».
VI		— « Senher, be sabem quais so
	85	Falsas promessas ses do,
		Qu'ieu non ai cor que·us don renda;
		E faitz alhor vostre pro! »