Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 286,001=070,014 Autor: Lemozi, Bernart de Ventadorn Gènere: Tenso Número: XIV

 

Bernart de Ventadorn, del chan

I	1	Bernart de Ventadorn, del chan
		vos sui sai vengutz assalhir.
		car vos vei estar en cossir,
		no posc mudar que no·us deman
	5	co·us vai d’amor. Avetz-en ges ?
		be par que no·us en venha bes.
II		Lemozi, no·us posc en chantan
		respondre, ne i sai avenir.
		mos cors me vol de dol partir.
	10	bels amics, a Deu vos coman,
		que mort m’a una mala res,
		c’anc no·n me valc Deus ni merces.
III		Bernart, s’anc no·us fetz bel semblan,
		enquera·s pot esdevenir.
	15	no·s tanh c’om ab amor s’azir
		can la troba de son talan.
		pauc gazanha drutz d’ira ples,
		car per un dol n’a dos o tres.
IV		Lemozi, mout fetz gran enjan
	20	la bela qui·m pogr’ enrequir,
		que, can mi poc de se aizir,
		et ela·m tornet en soan.
		no i a conort qui fort no·m pes,
		car ilh es, cosselh no·n pres.
V	25	Bernart, totz om deu aver dan,
		s’a la cocha no sap sofrir ;
		c’amors se vol soven servir ;
		e si so tenetz ad afan,
		tot es perdut, s’anc re·us promes,
	30	si n’ eran plevidas mil fes.