Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 070,018 Autor: Bernart de Ventadorn Gènere: Canso Número: XVIII

 

E mainh genh se volv e·s vira

I	1	E mainh genh se volv e·s vira
		mos talans, e ven e vai,
		lai on mos volers s’atrai.
		lo cors no·n pauza ni fina.
	5	si·m te conhd’ e gai
		fin’ amors, ab cui m’apai :
		no sai com me contenha !
II		Ges amors nos franh per ira
		ni se fenh per dih savai,
	10	can es de bo pretz verai.
		qui la ten en dissiplina,
		re no sap que·s fai.
		que no cove ni seschai
		que nuls om la destrenha.
III	15	Eu·m sui cel qu’e re no tira.
		si tot ma domna·m sostrai,
		ja de re nom clamarai ;
		car es tan pur’ e tan fina
		que ja no creirai,
	20	si de so tort li quer plai,
		que merces no l’en prenha.
IV		Per mo grat eu m’en jauzira ;
		e pel bo talan qu’eu n’ai,
		m’es vejaire que be·m vai.
	25	gardatz : s’ela·m fos vezina,
		s’eu n’agra re mai ? —
		eu oc, c’aissi m’o aurai.
		s’a lei platz que·m retenha.
V		Messatger, mot me täina
	30	car tost non est lai.
		viatz veu e viatz vai,
		mas la chanso lh’ensenha.