Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 070,023 Autor: Bernart de Ventadorn Gènere: Vers Número: XXIII

 

La dousa votz ai auzida

I	1	La dousa votz ai auzida
		del rosinholet sauvatge,
		et es m’ins el cor salhida
		si que tot lo cosirer
	5	e·ls mals traihz qu’amors me dona,
		m’adousa e m’asazona ;
		et auria·m be mester
		l’autrui jois al meu damnatge.
II		Ben es totz om d’avol vida
	10	c’ab joi non a son estatge
		e qui vas amor no guida
		so cor e so dezirer ;
		car tot can es s’abandona
		vas joi e refrim’ e sona :
	15	prat e deves e verger,
		landas e pla e boschatge.
III		Eu, las ! cui Amors oblida,
		que sui fors del dreih viatge,
		agra de joi ma partida,
	20	mas ira·m fai destorber ;
		e no sai on me repona
		pus mo joi me desazona ;
		e no·m tenhatz per leuger
		s’eu dic alcu vilanatge.
IV	25	Una fausa deschauzida
		träiritz de mal linhatge
		m’a träit (et es träida,
		e colh lo ram ab que·s fer) ;
		e can autre l’arazona,
	30	d’eus lo seu tort l’ochaizona ;
		et an ne mais li derrer
		qu’eu, qui n’ai faih lonc badatge.
V		Mout l’avia gen servida
		tro ac vas mi cor volatge ;
	35	e pus ilh no m’es cobida,
		mout sui fols, si mais la ser.
		servirs c’om no gazardona,
		et esperansa bretona
		fai de senhor escuder
	40	per costum e per uzatge.
VI		Pois tan es vas me falhida,
(VII)	(50)	aisi lais so senhoratge,
		e no volh que·m si’ aizida
		ni ja mais parlar no·n quer.
	45	mas pero qui m’en razona,
		la paraula m’en es bona,
	(55)	e m’en esjau volonter
		e·m n’alegre mo coratge.
VII		Deus li do mal’ escharida
(VI)	50	qui porta mauvais mesatge,
		qu’eu agra amor jauzida,
		si no foso lauzenger.
	(45)	fols (es) qui ab sidons tensona,
		qu’e·lh perdo s’ela·m perdona,
	55	e tuih cilh son mesonger
		que·m n’an faih dire folatge !
VIII		Lo vers mi porta, Corona,
		lai a midons a Narbona,
		que tuih sei faih son enter,
	60	c’om no·n pot dire folatge.