Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,017 Autor: Marcabru Gènere: Vers Número: XVII

 

Dirai vos en mon lati

I(*)	1	Dirai vos en mon lati
		De so qu'ieu vei e que vi ;
		Non cuich que·l segles dur gaire
		Segon qu'escriptura di,
	5	Qu'eras faill lo fills al paire
		E·l pair' al fill atressi.
II		Desviatz de son cami
		Jovens se torn' a decli,
		E Donars qu’era sos fraire,
	10	Va s'en fugen a tapi,
		C’anc dons Costans l'enganaire
		Joi ni Joven non jauzi.
III		Soven de pan e de vi
		Noiris rics hom mal vezi,
	15	E si·l tengues de mal aire
		Segurs es de mal maiti,
		Si no·i ment lo gazaignaire
		Don lo reproviers issi.
IV		Lo mouniers jutg'al moli :
	20	Qui ben lia ben desli ;
		E·l vilans ditz tras l'araire :
		Bons fruitz eis de bon jardi,
		Et avols fills d'avol maire
		E d'avol caval rossi.
V	25	Eras naisson dui poilli
		Beill, burden, ab saura cri
		Que·is van volven de blanc vaire
		E fan semblan aseni ;
		Jois e Jovens n'es trichaire
	30	E malvestatz eis d'aqui.
VI		Moillerat, ab sen cabri,
		Atal paratz lo coissi
		Don lo cons esdeven laire ;
		Que tals ditz : « Mos fills me ri »
	35	Que anc ren no·i ac a faire :
		Gardatz sen ben bedoï.
VII		Re no·m val s'ieu los chasti,
		C'ades retornan aqui.,
		E puois un non vei estraire
	40	Marcabrus d'aquel trahi,
		An lo tondres contra·l raire,
		Moillerat, del joc coni.
VIIIa		An lo tondres contra·l raire,
		Moillerat, del joc coni.

 

Note :

(*) Voir les leçons de T 205 et de J. (↑)