Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,021 Autor: Marcabru Gènere: Vers Número: XXI

 

Bel m'es quan la fuelh'ufana

I	1	Bel m'es quan la fuelh'ufana
		E[n] l'auta branquilha
		E·l rossinholet[s] s'afana
		Desotz la ramilha
	5	Que·l platz frims, a la luguana
		Del chant que grezilha.
II		Quecx auzel[s] quez a votz sana
		De chantar s'atilha,
		E s'esforsa si la rana
	10	Lonc la fontanilha,
		E·l chauans ab sa chauana,
		S'als non pot, grondilha.
III		Sesta creatura vana
		D'amor s'aparilha,
	15	Lur joys sec la via plana
		E·l nostre bruzilha ;
		Quar nos, qui plus pot enguana,
		Per qu'usquecx buzilha.
IV		Volpils lengua traversana
	20	Qu'a lairo cossilha,
		Ab sa messorgua baussana
		Desert' ez essilha,
		So per qu'amor segurana
		Non truep ses ruylha.
V	25	Jovens feuney' e trefana
		E Donars becilha,
		Saubud' es causa certana
		Que Valors guancilha,
		E Maluestatz va sobrana
	30	La mair' e la filha.
VI		Pieger es que gualiana
		Amors que guespilha,
		Cruzels cozens e baiana
		Calens e frezilha
	35	Quar molt tratz mal e safrana
		Selhuy cui estrilha.
VII		Sist falsa gent crestiana
		Qu'en crim pec fremilha,
		A la fi ves Corrossana
	40	Vira l'escobilha,
		Que·l baptismes de Jordana
		Lur notz e·ls perilha.