Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,030 Autor: Marcabru Gènere: Pastorela Número: XXX

 

L'autrier jost' una sebissa

I	1	L'autrier jost' una sebissa
		Trobei pastora mestissa,
		De joi e de sen massissa,
		Si cum fîlla de vilana,
	5	Cap' e gonel’ e pelissa
		Vest e camiza treslissa,
		Sotlars e caussas de lana.
II		Ves lieis vinc per la planissa :
		« Toza, fi·m ieu, res faitissa,
	10	Dol ai car lo freitz vos fissa. »
		— « Seigner, so·m dis la vilana,
		Merce Dieu e ma noirissa,
		Pauc m'o pretz si·l vens m'erissa,
		Qu'alegreta sui e sana. »
III	15	— « Toza, fi·m ieu, cauza pia,
		Destors me sui de la via
		Per far a vos compaignia ;
		Quar aitals toza vilana
		No deu ses pareill paria
	20	Pastorgar tanta bestia
		En aital terra, soldana. »
IV		— « Don, fetz ela, qui que·m sia,
		Ben conosc sen e folia ;
		La vostra pareillaria,
	25	Seigner, so·m dis la vilana,
		Lai on se tang si s'estia,
		Que tals la cuid' en bailia
		Tener, no·n a mas l'ufana. »
V		— « Toza de gentil afaire,
	30	Cavaliers fon vostre paire
		Que·us engenret en la maire,
		Car fon corteza vilana.
		Con plus vos gart, m'etz belaire,
		E per vostre joi m'esclaire,
	35	Si·m fossetz un pauc humana ! »
VI		— « Don, tot mon ling e mon aire
		Vei revertir e retraire
		Al vezoig et a l'araire,
		Seigner, so·m dis la vilana ;
	40	Mas tals se fai cavalgaire
		C'atrestal deuria faire
		Los seis jorns de la setmana. »
VII		— « Toza, fi· m ieu, gentils fada,
		Vos adastret, quam fos nada,
	45	D'una beutat, esmerada
		Sobre tot' autra vilana ;
		E seria·us ben doblada,
		Si·m vezi' una vegada,
		Sobira e vos sotrana. »
VIII	50	— « Seigner, tan m'avetz lauzada,
		Que tota·n sui enojada ;
		Pois en pretz m' avetz levada,
		Seigner, so·m dis la vilana,
		Per so n'auretz per soudada
	55	Al partir : bada, fols, bada,
		E la muz'a meliana. »
IX		— « Toz', estraing cor e salvatge
		Adomesg' om per uzatge.
		Ben conosc al trespassatge
	60	Qu'ab aital toza vilana
		Pot hom far ric compaignatge
		Ab amistat de coratge,
		Si l’us l'autre non engana. »
X		— « Don, hom coitatz de follatge
	65	Jur' e pliu e promet gatge :
		Si·m fariatz homenatge,
		Seigner, so·m dis la vilana ;
		Mas ieu, per un pauc d'intratge,
		Non vuoil ges mon piucellatge,
	70	Camjar per nom de putana. »
XI		— « Toza, tota creatura
		Revertis a sa natura :
		Pareillar pareilladura
		Devem, ieu e vos, vilana,
	75	A l'abric lonc la pastura,
		Car plus n'estaretz segura
		Per far la cauza doussana. »
XII		— « Don, oc ; mas segon dreitura
		Cerca fols sa follatura,
	80	Cortes cortez' aventura,
		E·il vilans ab la vilana ;
		En tal loc fai sens fraitura
		On hom non garda mezura,
		So ditz la gens anciana. »
XIII	85	— « Toza, de vostra figura
		Non vi autra plus tafura
		Ni de son cor plus trefana. »
XIV		— « Don, lo cavecs vos ahura,
		Que tals bad' en la peintura
	90	Qu'autre n'espera la mana. »
		Dans T seulement.
		Gies non gar[d] a la pintura
		Cel c'en espera la mana.