Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,034 Autor: Marcabru Gènere: Vers Número: XXXIV

 

Hueymais dey esser alegrans

I	1	Hueymais dey esser alegrans
		Pus l'aura doussa vey venir
		Et auch lays e voutas e chans
		Dels auzelhs que·m fan esbaudir;
	5	Lo gen[s] temps me fai alegrar,
		Mas per Joven me desconort
		Quar totz jorns lo vey sordeyar.
II		D'una ren suy meravelhans
		Qu'ades vey granar e florir
	10	Escassetatz, oc! et Enjans:
		Vas qualque part me torn ni·m vir
		Cortezia ni Bel Estar
		Ni Pretz ni Valor ni Deport
		Vas nulha part no vey renhar.
III	15	Ist lauzengier, lenguas trencans
		Cuy Dieus cofonda et azir,
		Meton Proeza en balans
		E fan Malvestat enantir;
		Mais als pros dic e vuelh pregar
	20	Que ja us ab elhs no·s n'acort
		Si en proeza vol estar.
IV		Eyssamens son domnas trichans
		E sabon trichar e mentir,
		Per que fan los autrus enfans
	25	Als maritz tener e noyrir;
		D'aqui naisso·l malvat avar
		Qu'us non ama Joy ni Deport
		Ni n'auza hom entr'elhs parlar.
V		Ja Dieus no·l sia perdonans
	30	Qui las vol onrar ni servir,
		Estas putas ardens cremans
		Pejors que ieu no·us saubra dir;
		Tan lor sap bo lo clau copar,
		Que non hi guardon dreg ni tort,
	35	Mas selh que mielhs las sap ronsar!
VI		Qui anc fon prezats ni amans
		Per dompnas, ben s'en deu gequir!
		Qu'aytan s'en aura us truans
		O mais, si mais li post bastir;
	40	Et ieu poiri'o ben proar
		Per ma domna na Cropa fort
		Mas ja no la vuelh decelar.
VII		Messatge[s] cortes, ben parlans,
		Vai t'en en Urgel ses falhir,
	45	E sias del vers despleyans
		A'n Cabrieira, que lo remir,
		E potz li dir senes gabar
		Qu'en tal loc ai tornat ma sort
		On elh poiria pro muzar.