Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,038 Autor: Marcabru Gènere: Vers Número: XXXVIII

 

Pois la fuoilla revirola

		AEIKa
		Graphie de A.
I	1	Pois la fuoilla revirola
		Que vei d'entre·ls cims cazer,
		Que·l vens deromp e degola,
		Que no·is pot mais sostener,
	5	Mais pretz lo freich temporau
		Que l'estiu plen de gandill
		Don nais puti' et enveia.
II		Lo pics e la rossignola
		Tornon lor chant en tazer,
	10	Si·s fa·l gais e l'auriola,
		Don l'inverns fai son plazer;
		E l'orgoills torn' en canau
		Per garssos plens de grondill,
		Qu'en estiu contradenteia.
III	15	Graissans ni serps que s'amola
		No·m fant espaven ni mau,
		Mosca ni tavans que vola,
		Escaravait ni bertau,
		Aquist malvatz volatill
	20	Non sent bruir ni oler,
		Don francs inverns nos neteia.
IV		Ges l'afilatz bec d'aissola
		Non pert son loc al fogau,
		Anz porta pic e massola
	25	Don son gran li dui mau.
		Cest tol si donz al jazer
		La dolor del penchinill,
		Pel feminiu don se breia.
V		Cest trai del mieill la briola
	30	Plen' al maitin et al ser,
		E sobre·l faire faissola,
		Car pot la coa mover;
		Cest fai la nuoich son jornau,
		Don engenrra un bel fill,
	35	Per que sobreseignoreia.
VI		Cazen levan trobaiola
		Va·l segles e no m’en chau.
		Aissi cum la seguignola,
		Poi’ amon e chai avau.