Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,039 Autor: Marcabru Gènere: Vers Número: XXXIX

 

Pois l'iverns d'ogan es anatz

I	1	Pois l'inverns d'ogan es anatz
		E·l douz temps floritz es vengutz,
		De moutas guisas pels plaissatz
		Aug lo refrim d'auzels menutz;
	5	Li prat vert e·il vergier espes
		M'ant si fait ab joi esbaudir,
		Per qu'ie·m sui de chant entremes.
II		Totz lo segles es encombratz
		Per un albre que·i es nascutz,
	10	Autz e grans, brancutz e foillatz,
		Et a meravilla cregutz,
		Et a si tot lo mon perpres
		Que vas neguna part no·m vir,
		No·n veia dels rams dos o tres.
III	15	Empero aissi es levatz,
		E vas totas partz espandutz
		Que lai d'outra·ls portz es passatz
		En Franss' et en Peitau vengutz;
		Qu'ieu sai qu'el es en tal defes,
	20	E dic ver, segon mon albir,
		Qu'en tenra sa verdor jasses.
IV		E per so s'es enrazigatz
		Car greu sera mais abatutz;
		Que la razitz es Malvestatz,
	25	Per que Jovens es confondutz,
		E tornatz en tal contrapes
		Per cels qui·l degran obezir,
		Que tant non cridon c'us l'ades.
V		Meravill me de poestatz
	30	On a tans joves e canutz,
		Comtes e reis, et amiratz
		E princes en l'albre pendutz;
		Mas lo latz escarsetatz es
		Que lor fai si lo col flaquir
	35	C'us non esperetz ja·is mogues.
VI		Jovens fo ja bautz apellatz,
		Mas aras es si recrezutz
		Que jamais non er tant honratz
		Per que Jois li sia rendutz,
	40	C'Avoleza l’a si conques
		C’anc de pois no·n poc erebir
		Que·is parti de lui Dreitz ni Fes.
VII		Loncs temps a que no·l fo donatz
		Sai entre·ls baros mentaugutz ;
	45	Faiditz es e loing issillatz;
		En lai on el es remasutz,
		Marcabrus li manda per mes
		[Qu]e no·il calia tant fugir,
		Que jamais, no, sai sera pres.
VIII	50	Non puosc sofrir qu·als moilleratz
		Non diga lor forfaitz saubutz;
		Non sai la cals auctoritatz
		Lor mostra c'om los apel drutz;
		Semblan fant de l'ase cortes,
	55	C'ab son seignor cuidet bordir,
		Cant lo vic trepar ab sos ches.
IX		De tals sa·n vei enrazigatz,
		Los fols, e·ls savis deceubutz
		Per los acropitz penchenatz
	60	Que tot jorn demandon salutz,
		E demandon aco per ces;
		C’anc nuills francs hom non dec sofrir
		C’aitals gastaus fumos tengues.