Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,041 Autor: Marcabru Gènere: Vers Número: XLI

 

Pus s'enfulleysson li verjan

I	1	Pus s'enfulleysson li verjan
		E·l glaujol de lonc lo riu blan,
		Qui que paus, ieu pes e cossir
		De moutas cauzas a sobriers,
	5	Segon natura et estiers,
		De qu'auzem lo poble brugir.
II		Pus la cogossia s'espan
		E l’us cogos l'autre non blan,
		Laissem los anar e venir.
	10	Cuy cal quals que chaps an primiers?
		Qu'ieu non daria dos deniers
		Per lor mesclanhas devezir.
III		Qu'aissi·s vai lo pretz menuzan
		E·l folhatges hieis de garan,
	15	Non puesc, sols, lo fuec escantir
		Dels seglejadors ufaniers,
		Qui fan los criminals dobliers,
		Pejors que no·us aus descobrir.
IV		Las baratairitz baratan,
	20	Frienz del barat corbaran,
		Que fan Pretz e Joven delir,
		Baraton ab los baratiers
		Fundens qu'estiers lor deziriers
		No·m podon celar de frezir.
V	25	E s'ieu cug anar castian
		La lor folhia, quier mon dan;
		Pueys s'es pauc prezat si·m n'azir,
		Semenan vau mos castiers
		De sobre·ls naturals rochiers
	30	Que no vey granar ni florir.
VI		S'anc fui de la mus' en afan,
		Lo musatg' ai rendut musan,
		Tro per aillor non puosc' issir.
		Tans n'i vei dels contraclaviers,
	35	Greu sai remanra conz entiers
		A crebar ni a meich partir.
VII		A Dieu m'autrey, quo·s pot fisan,
		Lo segle cazen e levan!
		Mas a tart mi vuelh penedir,
	40	Pero si·n suy plus viausiers
		Que chatz o mostre·l reprobiers
		Cuy (?) lo savis fetz lon...
VIII		Qu'aissi va
		Marcabrus
	45	del tot uol... ir
		elhas els fal... ie
		no sia coaze
		del aculhir.
IX		Si non foss . . . . . . . . an
	50	Ricx fora, prenden e donan,
		Mas de luenh m'an fayt magrezir,
		Ja mai non lur serai guerriers,
		. . . . . . . . . . . . . . . .
		Que no·m puesc la guerra sofrir.