Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 124,007 Autor: Daude de Pradas Gènere: Canso Número: -

 

De lai on son miei desir

		Orthographie nach A.
I	1	De lai on son miei desir                     (- 1)
		car sai qe cill no·m desira,
		per q’ieu soven plaing e sospir ;
		mas ill non plaing ni sospira.
	5	per so de lieis fort mi rancur,
		et es dreita ma rancura,
		q’ieu non pens d’autra ren ni cur,
		et ill de mi non a cura.
II		En mi son tuich aquil conssir
	10	don nulhs fis amans cossira ;
		e si be·m vau ni·m volv ni·m vir,
		mos cors no·is volv ni no·is vira
		de lieis que aten que·m meillur,
		que tot so qe·is vol, meillura,
	15	e sol c’aillors no se pejur
		amors, ab lieis non pejura.
III		Totz los afans qe·m fai sofrir,
		mout voluntiers los sofrira,
		si ’la·m deignes sol acuillir
	20	tant gen cum ieu l’acuilira.
		ja no·ill agra cor fals ni dur.
		doncs, per que m’es ill tant dura ?
		qe on plus ieu vas lieis m’atur,
		et ill meins vas mi s’atura.
IV	25	Si s’agrades de mon servir,
		de tot mon sen la servira,
		car d’aqest mal qe·m fai languir,
		sai ben que puois non languira ;
		mas ill non vol precs ni conjur,
	30	e si merces non conjura
		tant c’un pauc vas me s’adreitur,
		non aura de mi dreitura.
V		Non puosc mudar c’ades non tir
		lai on mos mals aips me tira,
	35	qar tot mon cor m’a faich partir
		de lai, don ja no·is partira,
		si·l sieu esgart dousset e pur,
		qe·m fan cuidar qu’il es pura,
		mi dissesen qe·m fes segur
	40	de lieis que no m’asegura.