Bosdorff, Günther. Bernard von Rouvenac ein provenzalischer Trobador des XIII. Jahrhunderts Kritische Ausgabe mit Einleitung, Übersetzung, Kommentar und Glossar. Erlangen: Kgl. bayer. Hof- u. Univ.-Buchdruckerei von Junge & Sohn, 1907.

Codi: 066,003 Autor: Bernart de Rovenac Gènere: Sirventes Número: I

 

Ja no vuelh do ni esmenda

I	1	Ja no vuelh do ni esmenda
		Ni grat retener
		Dels rics ab lur fals saber ;
		Qu’en coratg’ ai que reprenda
	5	Lurs vils fatz mal issernitz,
		E no vuelh sia grazitz
		Mos sirventes entre·ls flacs nualhos
		Paubres de cor e d’aver poderos.
II		Rei engles prec que m’entenda,
	10	Quar fa dechazer
		Son pauc pretz per trop temer ;
		Quar no·l plai que·ls sieus defenda,
		Qu’ans es tan flacs e marritz
		Que par que si’ endurmitz,
	15	Que·l reis frances li tol en plas perdos
		Tors et Angieus e Normans e Bretos.
III		Reis d’ Arago ses contenda
		Deu ben nom aver
		Jacme, quar trop vol jazer.
	20	E qui que sa terra·s prenda,
		El es tan flacs e chauzitz
		Que sol res no i contraditz.
		E car ven lai als Sarrazis fellos
		L’anta e·l dan que pren sai vas Limos.
IV	25	Ja tro son paire car venda,
		No pot trop valer ;
		Ni·s cug qu’ieu·l diga plazer,
		Tro foc n’abran e n’essenda
		E·n sian grans colps feritz.
	30	Pueis er de bon pretz complitz,
		S’al rei frances merma sas tenezos,
		Quar el sieu fieu vol eretar N’Anfos.
V		Coms de Toloza, la renda
		Que soletz tener
	35	De Belcaire·us deu doler.
		S’al deman faitz long’ atenda,
		Vos e·l reis que·us es plevitz,
		L’enprendemen n’er aunitz,
		S’ar no vezem tendas e pabalhos
	40	E murs fondre e cazer autas tors.
VI		Rics omes mal issernitz,
		Enueia·m vostres malditz,
		E laissera·us, s’ie·us vis arditz ni pros,
		Mas no·us tem tan que ja menta per vos.