Bosdorff, Günther. Bernard von Rouvenac ein provenzalischer Trobador des XIII. Jahrhunderts Kritische Ausgabe mit Einleitung, Übersetzung, Kommentar und Glossar. Erlangen: Kgl. bayer. Hof- u. Univ.-Buchdruckerei von Junge & Sohn, 1907.

Codi: 066,004 Autor: Bernart de Rovenac Gènere: Sirventes Número: II

 

Una sirventesca

I	1	Una sirventesca,
		·N Rainier, tota fresca
		·Us metrai en cabal
		Quar tan gent anatz en tresca
	5	E d’armas no·us cal,
		E quar ressemblatz a·N Bresca
		De dir mal a la riquesca.
		Man colp vergonhal
		Mal
	10	N’avetz resseubut a man portal.
II		Cobla lauzengeira
		Fes e messongeira,
		Quar en cort comtal
		Dis vostra lengua parleira
	15	Al comte greu mal,
		E si la fes lagoteira,
		Anc no·n gueris de paupreira.
		Man colp vergonhal
		Mal
	20	N’avetz resseubut a man portal.
III		Per rauba rompuda
		Donetz lans’ aguda ;
		Pero be·us o val ;
		Quar vostra lengua es temsuda
	25	Trop mais que·l senhal,
		Per que n’avetz manta muda
		Fracha et escoissenduda.
		Man colp vergonhal
		Mal
	30	N’avetz resseubut a man portal.
IV		Pus glotz es de pelha
		Non es lops d’ovelha
		Ni d’autre carnal,
		Qu’antan vos fos a Marcelha
	35	Feritz ab un pal
		Per una capa vermelha,
		Que vo·n anavatz ab elha.
		Man colp vergonhal
		Mal
	40	N’avetz resseubut a man portal.
V		Quan per joglaria
		Detz cavallairia
		Fes sen natural.
		Ben prezetz so que·us tanhia,
	45	Joglar vernassal,
		Quar ges armars no·us plazia,
		Mais vos plac la trichairia.
		Man colp vergonhal
		Mal
	50	N’avetz resseubut a man portal.
VI		Ar me lais per tota via
		De vostre dir mal,
		Qu’en vos es tan de follia
		Que mos maldirs no i parria.
	55	Man colp vergonhal
		Mal
		N’avetz resseubut a man portal.