Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Codi: 457,012 Autor: Uc de Sant Circ Gènere: Canso Número: XV

 

Enaissi cum son plus car

I	1	Enaissi cum son plus car
		Qe non solon miei cossir
		E plus onrat miei desir,
		Dei plus plazen chansson far ;
	5	E s’ieu tant plazen chansso
		Fatz cum ai plazen razo,
		Ben er ma chanssos plazens
		Et gaia et avinens ;
		Qe·il dig e·il faich e·il ris e·il bel semblan
	10	Son avinen de vos per cui eu chan.
II		Per qe·m dei ben esforssar
		Ab lauzar et ab ben dir
		De vostre ric pretz grazir,
		E dei Amor merceiar
	15	Car de me vos a fait do ;
		Car be·m rent ric guizerdo
		Dels greus durs maltraitz cozens,
		E·ls doutz plazens pessamens
		Q’ieu ai de vos, cui am e voill e blan
	20	E fuich e sec e desir e soan.
III		Sens vos me fai soanar
		Que no m’en mostra jauzir ;
		Azautz m’en fai abellir,
		Dompna, e·us mi fai desirar ;
	25	E sec vos car m’es tan bo
		Qan remir vostra faisso ;
		E·us fuig pel brui de las gens,
		E·us blan car etz tant valens,
		E·us voill cum etz per servir derenan,
	30	E·us am car vei c’a mon cor plazetz tan.
IV		S’ieu volia ben lauzar
		Vostra valor ses mentir
		E l’honrar et l’acuillir
		E·l vostre avinen parlar
	35	E las beutatz qu’en vos so
		E·ill beill si e·il plazen no
		E·ls rics gais captenemens,
		Ben sabria·l meins sabens
		Cals etz ; per q’ieu non vos voill lauzar tan
	40	Cum mostra vers ni cum ai en talan.
V		Ges no m’ausi conssirar
		Que vos prec, ni vos aus dir
		Cum m’en faitz languen morir,
		Ni no·m voill desesperar,
	45	Q’en la vostr’ entenssio
		Sui rics, pois ai sospeisso
		C’Amors qe·lz rics autz cors vens
		Mi puosca aitant leumens
		De vos donar so que eu vos deman
	50	Cum mi per vos far morir desiran.
VI		Bella dompna, ges no·m par
		C’om deia mais obezir
		Autra dompna, ni servir
		En dreich d’amor ni honrar ;
	55	Et a ben plazen sazo
		Cel qu’ es en vostra preiso,
		Qe·l vostr’ omils francs parvens
		Fai dels cors mortz vius gauzens
		E·il mal que datz son ben e pro li dan
	60	E l’ira jois e repaus li affan.
VII		Na Salvatga, mout es gens
		Vostre bel comenssamens,
		Qe·il dig son gai e li faich benestan
		E·l cors plazens e d’avinen semblan.