Bec, Pierre. Burlesque et obscénité chez les troubadours. Pour une approche du contre-texte médiéval. Paris: Stock, 1984.

Code: 183,002 Autor: Guilhem de Peitieu Gattung: Vers Ausgabe: I

Ben vuelh que sapchon li pluzor

I	1	Ben vuelh que sapchon li pluzor
		D'un vèrs, s'es de bona color
		Qu'ieu ai trach de bon obrador ;
		Qu'ieu pòrt d'aicel mester la flor,
	5	Et es vertatz,
		E puesc ne trair la vèrs auctor,
		Quant èr laçatz.
II		Eu canosc ben sen e folor,
		E conosc anta et onor,
	10	Et ai ardiment e paor ;
		E si'm partetz un jòc d'amor,
		Non soi tan fatz
		Non sapcha triar lo melhor
		D'entre'ls malvatz.
III	15	E conosc ben cel que be'm di
		E cel que'm vòl mal atressí ;
		E conosc ben celui que'm ri,
		E cels que s'azauton de mi
		Conosc assatz :
	20	Qu'atressí dei voler lur fi
		E lur solatz.
IV		Ben a ja cel que me noirí,
		Que tan bon mester m'escarí
		Que anc a negun non falhí :
	25	Qu'ieu sai jogar sobre coissí
		A totz tocatz ;
		Mas ne sai de nulh mon vezí,
		Qual que'n vejatz.
V		Deu en laus e sant Julià :
	30	Tant ai aprés del jòc douçà
		Que sobre totz n'ai bona ma ;
		Ja òm que conselh me querrà
		Non l'èr vedatz,
		Ni nulhs de mi non tornarà
	35	Desconselhatz.
VI		Qu'ieu ai nom maïstre certà :
		Ja m'amig' anuech non m'aurà
		Que no'm vuelh' aver l'endemà ;
		Qu'ieu soi ben d'est mester, çò'm va,
	40	Tant ensenhatz
		Que be'n sai gazanhar mon pa
		En totz mercatz.
VII		Però non m'auzetz tant gaber
		Qu'ieu non fos raüsatz l'autrer,
	45	Que jogav' a un jòc grosser
		Que'm fo tròp bos al cap primer
		Tro fo entaulatz ;
		Quan gardèi, non m'ac plus mester,
		Si'm fo camjatz.
VIII	50	Mas ela'm dis un reprover :
		« Dòn, vòstre datz son menuder
		Et ieu revit vos a dobler ! »
		Fis m'ieu : « Qui'm dava Montpesler
		Non èr laissatz ! »
	55	E levèi un pauc son tauler
		Ab ambs mos bratz.
IX		E quan l'aic levat lo tauler
		Espeis los datz :
		E'l dui foron cairat valer,
	60	E'l tèrtz plombatz.
X		E fi'ls ben ferir al tauler,
		E fon jogatz.