Bec, Pierre. Burlesque et obscénité chez les troubadours. Pour une approche du contre-texte médiéval. Paris: Stock, 1984.

Code: 335,011 Autor: Peire Cardenal Gattung: Canso Ausgabe: IV

Ben tenh per fòl e per musart

I	1	Ben tenh per fòl e per musart
		Cel qu'ab amor se lia,
		Car en amor pren pejor part
		Aquel que plus s'i fia :
	5	Tals se cuida calfar que s'art.
		Los bens d'amor a òm a tart
		E'ls mals a cascun dia.
		Li fòl e'l felon e'l moissart
		Aquil an sa paria :
	10	Per qu'ieu me'n part.
II		Ja m'amia non mi tendrà
		Si ieu leis non tenia ;
		Ni ja de mi non jauzirà
		S'ieu de leis non jauzia.
	15	Conselh n'ai pres bon e certà :
		Farai-li segon que'm farà.
		E s'ela mi galia
		Galïador mi trobarà,
		E si'm vai dreita via
	20	Ieu l'irai pla.
III		Ac non gazanhèi tan gran re
		Com quan perdèi m'amia :
		Car, perdent leis, gazanhèi me,
		Qu'ilh gazanhat m'avia.
	25	Petit gazanha qui pèrt se,
		Mas qui pèrt çò que dan li te
		Ieu cre que gazanhs sia.
		Qu'ieu m'èra donatz per ma fe
		A tal que'm destruzia
	30	Non sai per qué.
IV		Donant me, mes en sa mercé
		Mi, mon còr e ma via —
		De leis que'm vira e'm desmanté
		Per autrui e'm cambia.
	35	Qui dona mais que non reté
		Et ama mais autrui que se
		Chausís àvol partia,
		Quan de se no'ilh cal ni'l sové
		E per aquò s'oblia
	40	Que pro no'ilh te.
V		De leis pren comjat per jassé
		Que jamais sieus non sia ;
		Qu'anc jorn no'i trobèi lei ni fe
		Mas engan e bauzia.
	45	Ai ! doussors plena de veré,
		Qu'amors eissòrba cel que ve
		E l'òsta de sa via,
		Quant ama çò qu'ilh descové
		E çò qu'amar deuria
	50	Gurp e mescré.
VI		De leial amia cové
		Qu'òm leial amics sia
		Mas de leis estaria be
		Qu'en galïar se fia
	55	Qu'òm galïès, quan sap de qué.
		Per qu'a mi plai quan s'esdevé
		Qu'ieu tròp qui la galia,
		E garda sa onor e se
		De dan e de folia
	60	E'il tira'l fre.