Bertoni, Giulio. I trovatori d'Italia. Modena: Editore Cav. Umberto Orlandini, 1915.

Código: 015,001=392,001 Autor: Albert Marques , Raimbaut de Vaqueiras Género: Tenso Número: III

Ara·m digatz, Rambaut, si vos agrada

I	1	Ara·m digatz, Rambaut, si vos agrada,
		Si·us es aissi, cum eu auch dire, pres,
		Que malamen s'es contra vos guidada
		Vostra dompna de sai en Tortones,
	5	Don avetz faich mainta cansson en bada;
		Mas ill a faich de vos tal sirventes
		Don etz aunitz, et ill es vergoignada,
		Que vostr'amors no·il es honors ni bes,
		Per q'ella s'es aissi de vos loignada.
II	10	[Albert Marques, vers es q'ieu ai amada
		L'enganairitz don m'avetz escomes,
		Que s'es de mi e de bon pretz ostada;
		Mas no·n puosc mais, qu'eren no·il ai mes pres,
		Anz l’ai totz temps servida et onrada;
	15	Mas vos e lieis persegua vostra fes,
		C’avetz cent vetz per aver periurada,
		Per qe·is clamon de vos li Genoes,
		Que, malgrat lor, lor empeignetz l'estrada].
III		Per Dieu, Rambaut, d'aisso·us port garentia
	20	Que maintas vetz per talan de donar
		Ai aver tout, e non per manentia
		Ni per thesaur q'ieu volgues aiostar;
		Mas vos ai vist cent vetz per Lombardia
		Anar a pe, a lei de croi ioglar,
	25	Paubre d'aver e malastruc d'amia,
		E feira·us pro qi·us dones a maniar,
		E membre vos co·us trobei a Pavia.
IV		[Albert Marques, enoi e vilania
		Sabetz ben dir e mieils la sabetz far,
	30	E tot engan e tota fellonia
		E malvastat pot hom en vos trobar
		E pauc de pretz e de cavallaria.
		Per qe·us tolgront, ses deman, Val de Tar;
		E Peiracorva perdetz per foillia,
	35	E Nicolos e Lafrancos da Mar
		Vos podon ben appellar de bausia].
V		Per Dieu, Rambaut, segon la mia esmansa,
		Fesetz que fols qan laissetz lo mestier
		Don aviatz honor e benanansa;
	40	E cel qe·us fetz de ioglar cavallier
		Vos det enoi trebaill e malanansa
		E pensamen et ir' et encombrier,
		E tolc vos ioi et pretz et alegransa,
		Que puois montetz de ronssin en destrier,
	45	Non fesetz colp d'espaza ni de lansa.
VI		[Albert Marques, tota vostr'esperansa
		Es en trazir et en faire panier;
		Enves totz cels c'ab vos an acordansa,
		E que·us servon de grat e volontier
	50	Vos non tenetz sagramen ni fiansa;
		E s'ieu non vail per armas Olivier
		Vos non valetz Rotlan, a ma semblansa,
		Que Plasensa no·us laissa Castaignier;
		Tol vos la terra e no·n prendetz veniansa].
VII	55	Sol Dieus mi gart, Rambaut, mon Escudier,
		En cui ai mes mon cor e m'esperansa,
		A mon dan get de trobar vos e 'n Pier,
		Vis de castron, magagnat, larga pansa.
VIII		[Albert Marques, tuich li vostre guerrier
	60	Ant tal paor de vos e tal doptansa,
		Qu'il vos clamon lo marches putanier,
		Deseretat, desleial, ses fiansa].