Bertoni, Giulio. I trovatori d'Italia. Modena: Editore Cav. Umberto Orlandini, 1915.

Código: 281,004 Autor: Lamberti di Buvalel Género: Canso Número: VI

Eu sai la flor plus bella d'autra flor

I	1	Eu sai la flor plus bella d'autra flor
		E plus plazen, als dichs dels conoissens,
		En cui es mais pretz e valors e sens,
		E deu per dreich portar maior lauzor
	5	C'autra del mon que hom saubes eslire,
		Car no·il faill res de ben c'om puosca dire;
		Qu'en lieis es senz honors e cortesia,
		Genz acuillirs ab tant bella paria,
		C'om no la ve que non si'enveios
	10	Del sieu ric pretz poiat sobrels plus pros.
II		E dic vos ben c'anc non trobet hom flor
		Que tant sembles coinda e sobravinens
		Ni c'ab semblans doutz e gais e plazenz
		Saubes poiar son pretz e sa valor
	15	Tant cum ill fai, que hom non pot escrire
		Los sieus bos aips ni sa beutat devire
		E s'ieu no·n dic de ben tant cum devria,
		Per so me·n lais que dire no·l sabria;
		Tant es sos pretz sobriers e cars e bos,
	20	Qui plus en ditz, mais i troba razos.
III		E qi·m volgues enqerre d'esta flor
		Cals es ni don, be·m ditz mos esciens
		Qui me n'enquier sembla·m desconoissens
		Puois tant au hom dire de sa ricor;
	25	Qu'il es de pretz al som, qui qe·is n'azire,
		E totz hom pros deu aver gran desire
		Qu'el vis dels oills cellieis, cui totz iois guia,
		La bella flor el prat on es floria,
		Don ieu serai totz temps mais desiros,
	30	Que qui la ve sempre·n sera ioios.
IV		Mas una ren dic ben de part la flor
		A trastotz cels qez hom ten entendens
		De las prezans e de las plus valens
		E qui se·n fant saben e chausidor,
	35	Que tot enans c'om sa beutat remire
		Ni que de lieis vezer sia iauzire,
		Gart si meteis qui'l es ni si·s faria
		A lieis vezer, que, s'aisso no·is taignia,
		Aprop l'esgart non sera poderos
	40	De ren parlar, tan tornera oblidos.
V		Et es trop laig c'aprop tant bella flor
		Si'hom pessatz ab tan de marrimens,
		Que no·ill puosca sivals sos covinens
		Dire e mostrar, ni'n tan clar mirador
	45	No·is taing que ia s'esgart hom ni·s remire,
		Si de bon pretz n'es amans e servire;
		Car si'l es pros ab l'esgart doblaria
		Lo pretz e·l sen q'en cent dobles valria,
		Don totz temps mais desirans e cochos
	50	Deuri'esser del sieu cors amoros.
VI		Chanssoneta, vai, ten la dreicha via
		Lai envers Est, on fis pretz cabalos
		Soiorn'e iai ab la meillor c'anc fos.