Bertoni, Giulio. I trovatori d'Italia. Modena: Editore Cav. Umberto Orlandini, 1915.

Código: 265,002=310,001 Autor: Joan d'Albuzo , Nicolet de Turin Género: Tenso Número: XVI

En Niccolet, d'un sognie qu'ieu sognava

I	1	[En Niccolet, d'un sognie qu'ieu sognava
		Maravillios una nuit qe·m durmia,
		Voil m'esplanez, qe molt m'espaventava.
		Totz lo sogni'es d'un'aigla qe venia
	5	Devers Salern, sus per l'aire volan,
		E tot qant es fugia li denan
		Si c'al seu senz encauzava e prendia,
		C'om denant lei defendre no·s poiria.]
II		Joan d'Albuçon, l'aigla demostrava
	10	L'emperador qe ven per Lombardia,
		E lo volars tant aut singnificava
		Sa gran valor per qe ciascuns fugia
		De totz aicels qe tort ni colpa li an;
		Qe ia de lui defendre no·s poiran
	15	Terra ni oms ni autra rens qe sia,
		Q'aisi com taing del tot segner non sia.
III		[En Nicolet, tan grant aura menava
		Aiqest'aigla qe tot qant es brugia,
		E una naus de Coloingna arivava,
	20	Maiers asaz qe dir non o porria,
		Plena de foc, per terra navican,
		E buffa·l foc l’aigla ab aura gran,
		Si qe lo focs ardia e alumnava
		Vas totas partz la on l'aigla volava.]
IV	25	Ioan, l’aigla, qe [vitz], tan fort ventava
		El gran tesaur, qe mena en Lombardia
		L'emperaire, e la naus qe·l portava
		Es la granz ostz dels Alamanz bandia,
		A cui dara del [seu] gran tesaur tan
	30	Qe l’ostz fara per toz locs son talan;
		E plaz mi fort qe·ls enemics castia
		E qe·ls amics meillior', e bon lur sia!
V		[En Niccolet, tot lo foc amorzava
		Aqest'aigla e un gran lum metia
	35	En Monferrat, qe tan fort esclarava
		Qe lo segles per tut se n'esbaudia
		[E] mettia d'autre lum per locs tan
		Qe tot qant es se n'annava allegran;
		Puis l’aigla sus en l'aire s'asedia
	40	En tant alt luoc qe tot lo mond vesia.]
VI		Joan, l’amorzamentz del foc semblava
		Patz, qe vorra l'emperaire aisi sia
		Qan s'er veniatz, e lo lums demostrava
		Qe·l marqes ren Monferrat, ses bausia,
	45	E li altri lum seran guierdon gran
		Q'auran de lui selh q'aver lo[s] deuran;
		E lo sesers en l'aire·m singnifia
		Qe·l mondz er pois toz a sa segnoria.
VII		[A l’onrat ric emperador presan,
	50	En Niccolet, don Dieus forza e talan
		Qe restaure valor e cortesia,
		Si cum li creis lo poder chascun dia.]
VIII		Joan, tot ço conois q'es benestan
		L'emperaire, per q'eu non vau dottan
	55	Q'aisi com a·l mielz del mond em bailia
		Deu ben aver del prez la signoria.