Bertoni, Giulio. I trovatori d'Italia. Modena: Editore Cav. Umberto Orlandini, 1915.

Código: 436,002=013,001 Autor: Simon Doria , Albert Género: Tenso Número: LI

N'Albert, chauçeç la cal mais vos plairia

I	1	N'Albert, chauçeç la cal mais vos plairia
		En dreit d'amor, puois tant forç n'es l'asais:
		Vostra dompna vestida cascun dia
		E causada aver dins un palais,
	5	O'n una canbra, sol qe lums no i sia,
		Tuta nuda, si co·us plairia mais,
		Cascuna nuog tenir per druderia
		Dinç un ric lieç? Causir podes uoi mais,
		C’al mieu senblant ieu sai ben cal penria.
II	10	Amics Simon, ben vos dic sen bausia
		Q'ieu am mil tans dompna tenir en pais
		Cascun giorn e causada e vestia
		En çanbra o en loc segur ses fais,
		C'aver sella in privat, qu'eu volria,
	15	Tuta nuda de nuotç qe no i fos rais,
		Q'eu non volgra dompna aver in balia
		S'ieu no la vis, qui me dones Roais,
		Per q'ieu vos dic qe als non iuiaria.
III		Amic Albert, mais am la nuotç escura
	20	Tenir midon [ses lum] en aisit lioc
		Qe·il toc son pieç e sa mamela dura
		C’adunc conplis a mon talent lo ioc,
		So qu'eu non posc cant a sa vestidura,
		So sabes ben e sai qe·m dires oc;
	25	Qe del sieu cors veser no·m prent gran cura
		Se·l giorn la vei vestid'e no la toc;
		Per q'ieu dic ben, se ben gardas dritura.
IV		Maistre Simon, non causes a mesura
		E ben mi par qe non sias al foc
	30	Don solias ia esser en grant cura,
		Ans crei omai qe sias del sen coc,
		Qe qant ieu vei la bela creatura
		Ieu sui mager qe·l segner de Maroc;
		C'aisi pogra tocar laida pentura,
	35	S'eu no la vis qan l'i sere ne·l broc;
		No·l creias mais q'il es paraula iscura.
V		Be·m meravigll, N'Albert, q'en tuta guisa,
		No m'autreas del plac so q'eu vos dic,
		Qe qan ieu tenc midons senes camisa,
	40	L'enperador non evei Frederic,
		Q'eu sai q'ell'es blancha e frescha e lisa;
		Donc cals obs m'es veder son gai cors ric,
		Don soi sertan qe val l'onor di Pisa?
		Pero be·us [lais] la sudor e·l fastic
	45	Veser lo iorn, puois tant l'aves enquisa.
VI		Ben es, Simon, vostra valor conquisa
		Puois qe amor aves mes en oblit,
		Qe de bordel par qe·us sia tramisa
		Can sol d'engan l'avetç tot a mendic;
	50	Mais cant ieu vei midons am penna grisa,
		Lo mons mi par qe sia tut floris;
		Adonc ieu sai s'es borges'o marqisa,
		Per q'ieu vos prec, c'anc mais no vos castic,
		No·us plasa mais d'entrar in tal fantisa.