Gambino, Francesca. Canzoni anonime di trovatori e "trobairitz". Alessandria: Edizioni dell'Orso, 2003.

Código: 461,191 Autor: Anonyme Género: Canso Número: V

Per ioi que d'amor m'avegna

I		Per ioi que d'amor m'avegna
		no·m calgra ogan esbaudir,
		qu'eu non cre qu'en grat me tegna
		cel c'anc non volc hobesir
	5	mos bos motz ni mas chansos;
		ni anc no fon la sazsons
		qu'ie·m pogues de lui sofrir;
		ans tem que·m n'er a morir,
		............ c'ab tal autra regna
	10	don per mi no·s vol partir.
II		Partir m'en er, mas no·m degna,
		que morta m'an li conssir:
		e pos no·ill platz que·m retegna,
		vueilla·m d'aitant hobesir
	15	c'ab sos avinenz respos
		me tegna mon cor ioios;
		e ia a sidonz non tir,
		s'ie·l fas d'aitan enardir,
		qu'ieu no·l prec per mi que·s tegna
	20	de leis amar ni servir.
III		Leis serva, mas mi·n revegna,
		que no·m lais del tot morir,
		.................... que m'estegna
		s'amors, don me fa languir.
	25	Hai! amics valenz e bos,
		car es lo meiller c'anc fos,
		non vuillaz c'aillors me vir!
		Mas no·m volez far ni dir
		con eu ia iorn me captegna
	30	de vos amar ni grasir.
IV		Grasisc vos, con que m'en pregna,
		tot lo maltrag e·l consir;
		e ia cavaliers no·s fegna
		de mi, c'u·ssol no·n desir,
	35	bels amics, si faz fort vos,
		on tenc los oilz ambedos;
		e plaz me can vos remir,
		c'anc tan bel non sai chausir.
		Dieus, prec c'ab mos bratz vos segna,
	40	c'autre no·m pot enriquir.
V		Rica soi, ab que·us suvegna
		com pogues en luec venir
		on eu vos bais e·us estregna,
		c'ab aitan pot revenir
	45	mos cor, ques es enveios
		de vos mout e cobeitos.
		Amics, no·m laissatz morir!
		Pueis de vos no·m puesc gandir,
		un bel semblan que·m revegna
	50	·m faiz, que m'ausiza·l consir.