Niestroy, Erich. Der Trobador Pistoleta. Halle a. S.: Verlag von Max Niemeyer, 1914.

Code: 372,004b Auteur: Pistoleta Genre: Canso Numero: IV

La maier temenza

I	1	La maier temenza
		q’eu aia de re
		es qe fassa faillenza
		vas leis qi·m trai . . .
	5	de cui sui hom e servire,
		e prec, si li platz, non m’azire,
		qe seus sui e serai
		totz temps qant [eu] vivrai,
		per far e dir son plazer,
	10	e dieus do·m esfortz e poder.
II		Ab ferma crezenza
		et ab bona fe
		[eu] vos port benvolenza,
		qe d’als no·m sove,
	15	ni d’altr’ afar non cossire,
		ni [no s]en re q’eu tant dezire ;
		e se·l bos cors q’eu sai
		no·m cre, doncs que farai ?
		qar senz vos non puesc aver
	20	gran gaug, ni d’aillor, non l’esper.
III		Mas long’ entendenza
		m’a [tant] trait ancse
		c’anc, pos aic cognossenza,
		no·m puesc far mon be ;
	25	mas aissi com bos suffrire
		vos sui del mal q’eu trai grazire,
		qar tant bella non sai ;
		e se·m dassetz unbai
		tro qe fos luecs del iazer,
	30	tuit mei trebaill foran lezer.
IV		Doncs franqeza·us venza,
		pois per prec de me
		non puesc trobar guirenza
		ab vos ni merce,
	35	ni sai vas qal part me vire,
		qe vostr’ amors me vol aucire
		senz colpa q’eu no l’ai ;
		e qi sens tort dechai
		zo qe deu plus car tener,
	40	granz pechatz li·n deu eschazer.
V		Chanzos, part Valenza
		vai a cel qe te
		bon pres senes bistenza.
		e larges’ ab se
	45	e cort de gaug e de rire
		e totz bos faigz, zo aug [ieu] dire,
		ab cor fin e verai
		e bels iocs, de qe·m plai
		qe non volgues retener
	50	zo qe fai altres dechaer.
VI		Peire Belmon, oimai
		sapchatz qe·us amarai,
		sol be·us voilhatz captener ;
		q’avols rics hom no·m pot plazer.