Niestroy, Erich. Der Trobador Pistoleta. Halle a. S.: Verlag von Max Niemeyer, 1914.

Code: 372,006a=097,013 Auteur: Pistoleta , Blacatz Genre: Tenso (Partimen) Numero: XI

Segner Blacatz, pos d'amor

		La tenzos de Pistoleta e d’en Blancatz.
I	1	Segner Blacatz, pos d’amor
		vos faitz tan pron ni tant vos en fegnetz,
		triatz de doas la meillor,
		e la plus avol vos a me giqetz :
	5	s’om a sidons porta [plus]fin’ amanza
		anz c’om la bais ni n’ai’ autre plazer,
		o pois, pos n’a tot zo qe·n vol aver ?
		q’aqi non par q’aia gran devinanza.
II		Pistolleta, a follor
	10	vos tenc qar aisso enaissi partetz ;
		qar on mais mi fai d’amor
		midonz, adoncs l’am ieu mais per un detz,
		l’ami e mais e mou la comensanza
		del douz baizar, e pois l’autre plazer !
	15	on miels mi fai, plus car la dei tener,
		qe trop pretz mais donar qes esperanza.
III		Segners, mais val a doblier
		que hom esper et aia bon enten,
		q’anc non vi drut vertadier
	20	vers sa donna, pos n’a fag son talen ;
		anz en dizon enoi e viltenenza,
		e ia enantz non los veirei fallir,
		mas pois los vei periurar e mentir ;
		mas vos non chal, sol qe l’eniantz [i venza].
IV	25	Pistoleta, qant enqier
		cella qu’ieu am, e vas leis mi prezen,
		n’ai maior gaug a sobrier,
		qan de s’amor mi fai autreiamen,
		que qi·m dava Lombardi’ e Proenza ;
	30	mas l’autra ren [ges] non poir’ ieu grazir ;
		qi per ben far vol son segnor trahir,
		ia Deu non don sa fe ni sa creenza.
V		Segner, n’Andrieus de Paris
		muri amantz, zo q’anc mais hom non fetz,
	35	e l’escudiers Gauzeris,
		e de Floris hai auzit maintas ves
		qi s’en fugi e laisset son repaire
		per Blanchaflor, e se i agues iagut,
		non feira tan, et ieu vos ai vencut,
	40	qar mantenetz zo don non sabetz gaire.
VI		Pistoleta, pauc conqis
		cel qi·n muri, q’eu non volh aital vetz ;
		qes anc non vol q’ieu muris
		cella q’ieu am, tan de plazers mi fes ;
	45	e ia no·m volgra tant mort l’emperaire,
		qe, s’ieu muris, il agra trop perdut,
		tostemps viurai per be q’ieu n’ai agut,
		e fora mortz, s’ieu non volges ben faire.
VII		Segner Blacatz, davant vos ai vencut,
	50	q’enantz lo far es hom plus larcs donaire.
VIII		Pistoleta, mal m’avetz cognegut,
		q’ieu met e don, e sui fiz et amaire.