Naudieth, Fritz. Der Trobador Guillem Magret. Halle a. S.: Verlag von Max Niemeyer, 1914.

Code: 223,002 Auteur: Guilhem Magret Genre: Canso Numero: I

Atrestan be·m tenc per mortal

I	1	Atrestan be·m tenc per mortal
		cum selh qu’avia nom Andrieu,
		dompna, pus chauzimens no·m val
		ab vos de cui tenc so qu’es mieu ;
	5	et ai vos ben mout servida,
		pros dompna et yssernida !
		Si per servir ni per honrar
		ni per sa dona tener car
		deu negus fis amans murir,
	10	ben conosc que·m devetz aucir.
II		Mas s’ieu muer de tan cortes mal
		cum es amors, ia no m’er grieu ;
		e, dona, pus de me no·us cal,
		faitzen vostre plazer em brieu,
	15	e si·us ai ma mort fenida !
		Pero, si·m tenetz a vida,
		vostres suy, e podetz me far
		ben o mal, qu’ieu de vos no·m gar ;
		mas per so qu’ie·us puesca servir,
	20	non vuelh enquers, si·us platz, morir.
III		Tan san amoros mey iornal
		que quec iorn vas tramet per fieu
		cent sospirs, que son tan coral
		que quant sec per home no·m lieu.
	25	Tan fort vos ai encobida
		que quan duerm, hom me rissida ;
		si·m faitz me mezeis oblidar
		que so que tenc, non puesc trobar ;
		e faitz m’a la gent escarnir
	30	quan so serc que·m vezon tenir.
IV		Dona non trobet plus leyal
		amors, c’a tag de vos mon dieu
		lo iorn que·us me det per aital
		qu’autra no·m pot tener per sieu !
	35	E doncx merces quo m’oblida,
		dona de bos aips complida !
		Que si·us me lays dieus gazanhar,
		no·us puesc plus encarzir, so·m par ;
		on plus d’autras beutatz remir,
	40	adoncx vos am mais e·us dezir.
V		Ye·us covenc per l’esperital
		senhor, ― don an tort li Iuzieu
		que nasquet la nueg de nadal,
		per cui son manht home romieu,
	45	dont es manhta naus perida ― ,
		qu’anc ves vos no fis fallida
		mas d’aitan que quan vos esgar,
		no·m puesc estener de plorar,
		que, per ma vergonha cobrir,
	50	n’ai fait manht tizon escantir.