Naudieth, Fritz. Der Trobador Guillem Magret. Halle a. S.: Verlag von Max Niemeyer, 1914.

Code: 223,007 Auteur: Guilhem Magret Genre: Canso Numero: IV

Trop mielhs m'es pres qu'a'n Golfier de las Tors

I	1	Trop mielhs m’es pres qu’a’n Golfier de las Tors :
		.............................................................
		et am dona aital cum la volria
		tener elh bratz, quar mi seri’ honors ;
	5	et ai senhor ai tal cum ops m’avia ;
		et ai trobat pus avinen leo
		quez elh no fetz e de maior preyzo ; ―
		huey mai no·m cal si non pessar d’amor,
		et amaray ma domna e mo senhor.
II	10	Ben avem vist de ric cavalh son cors,
		valen dona, que plus ric en vensia ;
		per qu’ieu veyrai si ia·us acossegria ;
		pero be say qu’esparviers ni austors
		ni lunhs auzelhs tan gent non volaria
	15	quo vos fugetz a selhs que vos son bo.
		Doncx que farai, pus no sai quals mi so?
		Encaussaray ? ― O yeu, tot per amor
		que no·m tornes a maior deshonor.
III		Dona, gardatz quossi·m destrenh amors !
	20	Valha·m ab vos merces e cortezia,
		e no vulatz ma mortz retracha·us sia
		ia per negu dels autres amadors :
		s’ieu era mortz, quascus s’en gardaria ;
		per qu’ieu no vuelh que fassatz fallizo
	25	ni qu’hom digua ren de vos si ben no,
		ni quier en re baissar vostra valor,
		qu’avetz tan gran qu’om no la sap maior.
IV		Quar vos laus tan, domna, sai qu’es follors
		e mos grans dans, s’a vos en sovenia
	30	que valhatz tan qu’a mi non tanheria ;
		e quar es vers, yeu dic tan de lauzors.
		E dir vos ai en que mos cors s’en tia :
		qu’en aut solier pueg’ hom menhs d’escalo,
		que del artelh ferm om tro qu’al talo ;
	35	aisso, dona, me lai mo sen follor,
		qu’ieu cug valer sobr’un emperador.
V		Ges per nulh gaug non daria los plors
		qu’ieu fatz per vos, quar semblan m’es que ria ;
		et estau sols entre gran companhia,
	40	quan pes de vos : tan m’en ven grans doussors
		al cor, dona, qu’ieu no sai on me sia ;
		tant ai al cor vostr’avinen faisso ;
		per qu’ieu vos quier dels vostres tortz perdo,
		que manhtas vetz s’esdeve qu’ie·us ador
	45	e·us clam merce en luec de bon senhor.