Naudieth, Fritz. Der Trobador Guillem Magret. Halle a. S.: Verlag von Max Niemeyer, 1914.

Code: 047,002 Auteur: Guilhem Magret Genre: Canso Numero: -

Aissi quon hom que senher ochaizona

I	1	Aissi quon hom que senher ochaizona
		ses tort, dompna, quan l’a en son poder,
		e·l quer merce e no la·n vol aver,
		ans lo ten tan tro que del sieu li dona,
	5	– m’ochaizonatz, quar vos platz e·us sap bo,
		e m’avetz mes, dompn’, en vostra preizo ;
		mais ia de me non auretz rezemso ;
		qu’enans vuelh que pres mi tenguatz,
		dompna, que si·m desliuravatz ;
	10	e non cug qu’om anc mais vis pres
		qu’esser desliuratz no volges.
II		Mas saber vuelh, dompna mieiller de bona
		e la genser qu’om anc pogues vezer,
		si m’auciretz, que no·us puesc mal voler,
	15	qu’eu non o cre ni·m semblatz tan fellona,
		e vos gardatz vos en de falizo,
		qu’atressi falh senher vas son baro
		quo·l bars vas lui, si·l men’ outra razo ;
		e per so que vos no fallatz,
	20	pus pres m’avetz, no m’auciatz ;
		valha·m ab vos ma bona fes,
		e humilitatz e merces !
III		Que s’ieu fos reys, vos agratz d’aur corona.
		Tan vos mi fai abelir e temer
	25	vostra beutatz, on ai mes mon esper
		si qu’az autra mos cors no s’abandona ;
		e membre vos, dompna, del guizardo,
		que loniamen ai servit em perdo !
		Mas fe que deg a mon ,Belh Companho‘,
	30	d’una re mi suy acordatz :
		cossi que vos en captenhatz,
		vos amaray, o·us plass’ o·us pes ;
		mas mot volgra mais que·us plagues !